काठमाडौं । नेपाली कांग्रेसका नेता नैनसिंह महरले नेपालका कम्युनिस्टहरू नवसामन्तका रूपमा उदाएको बताएका छन् । नेपाली कांग्रेस जिल्ला कार्यसमिति बाँकेको कार्यक्रममा नेता महरले ७५ वर्ष लामो इतिहास भएको कम्युनिस्ट पार्टीका नेताहरूमा समाजवादको आवरणमा सामन्तवाद हुर्किएको बताए ।
उनले बर्सौंको अभ्यासबाट पनि उनीहरूमा लोकतान्त्रिक प्रतिबद्धता र चरित्र विकास हुन नसकेको बताए ।
“कांग्रेसले ओली नेतृत्वको नेकपा सरकारलाई सत्ता सुम्पिँदा मुलुकको ऋण भार ६ खर्बमात्र थियो । केपी शर्मा ओली सत्ताबाट बाहिरिँदा झन्डै १७ खर्बको हाराहारीमा पुग्यो,” महरले भने, “बरालिएको अर्थतन्त्रलाई कांग्रेसले पुनः गतिमा ल्याउनै लाग्दा पुष्पकमल दाहालको कपटपूर्ण चरित्रले गठबन्धन फेरियो र एमालेसहितको सरकार बनेको छ ।”
उनले कम्युनिस्टहरूको सरकार बनेसँगै सत्ताको चरम दुरुपयोग सुरु भएको भन्दै राज्यकोषको दोहनले परिस्थिति पुनः जटिलतातर्फ फर्कने जोखिम बढेको बताए ।
'सहकारी ठग'लाई कानुनी दायरामा ल्याउनको सट्टा संरक्षण दिएर सत्ता जोगाउन लागिपरेको उनको आरोप थियो ।
“सहकारी ठगलाई कानुनी दायरामा ल्याएर जनतालाई राहत दिनुपर्नेमा सरकार उल्टै सहकारी ठगहरूलाई जोगाउने खेलमा लागिरहेको छ,” महरले भने ।
