काठमाडौं । मोबाइल चोरेर आपराधिक लाभ लिएको आरोपमा प्रहरीले एक जनालाई पक्राउ गरेको छ । पक्राउ पर्नेमा डोटीको जोरायल गाउँपालिका–२ का २७ वर्षीय निश्चल लामा रहेका छन् ।

उनलाई मंगलबार काठमाडौंस्थि सिनामंगल गोल्डेन गेटबाट पक्राउ गरिएको प्रहरीले जनाएको छ ।

प्रहरीका अनुसार उनले काठमाडौंका विभिन्न स्थानमा मोटरसाइकलमा लिफ्ट माग्थे । त्यसपछि आफ्ना आफन्तको हवाइ उडान रहेको बताएर उनले आफूले काठमाडौंको नयाँ बसपार्कमा गएर विभिन्न सामानहरू ल्याउनुपर्नेसहितका बहाना बनाउँथे ।

त्यसपछि उनले आफ्नो मोबाइल स्विचअफ रहेको बताएर मोबाइल माग्थे । मागेको फोनबाट कल गर्दै परपर हुँदै उनी भागेर जान्थे । चोरेको फोनमा भएको मोबाइल बैकिङमा उनले अनधिकृतरूपमा पहुँच बनाउँथे । उनले त्यसरी तीन लाख ६२ हजार रुपैयाँ निकालेको पाइएको प्रहरीले जनाएको छ । चोरीका मोबाइलहरू उनले हाम्रो बजार डट कममा राखेर बिक्री गर्थे ।

उनलाई काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले पक्राउ गरेको हो । थप अनुसन्धान र कारबाहीका लागि उनलाई जिल्ला प्रहरी परिसर टेकु पठाइएको छ ।