काठमाडौं । नेपाल चार्टर्ड एकाउन्टेन्ट्स संस्था (आईक्यान)ले वैशाख ६ र ७ गते काठमाडौंमा तेस्रो राष्ट्रिय सम्मेनलको आयोजना गरेको छ । राष्ट्रिय प्रज्ञा प्रतिष्ठानमा बिहीबार र शुक्रबार सम्मेलन चल्नेछ ।

‘अकाउन्टिङ प्रोफेसनल’हरूको यो सम्मेलन ‘दिगो लेखा अभ्यास’को थिममा आधारित रहने आईक्यानले जनाएको छ । संस्थाका अध्यक्ष सुजनकुमार काफ्लेका अनुसार उद्योग, वाणिज्य तथा आपूर्तिमन्त्री दामोदर भण्डारीले कार्यक्रमको उद्घाटन गर्नेछन् ।

कार्यक्रममा महालेखापरीक्षक, गर्भनर, राजस्व सचिव र इन्टरनेसनल फेडेरेसन अफ एकाउन्टेन्ट्स (आईएफएसी)की अध्यक्ष अस्मा रेसमौकीको उपस्थिति रहने आईक्यानले जनाएको छ ।

आईक्यानका अनुसार सम्मेलनमा एक हजारभन्दा बढी अकाउन्टिङ प्रोफेसनल्स (लेखा व्यवसायी) सहभागी हुनेछन् । यसअघि क्यानले सन् २०२२ मा पहिलो र सन् २०२३ मा दोस्रो राष्ट्रिय सम्मेलन आयोजना गरेको थियो ।