काठमाडौं । क्रिकेटर सन्दीप लामिछानेविरुद्धको बलात्कार मुद्दामा उच्च अदालत पाटनमा अन्तिम सुनुवाइ भइरहेको छ  ।

न्यायाधीशद्वय मुनेन्द्रप्रसाद अवस्थी र दुर्गाप्रसाद ढुंगेलको संयुक्त इजलासमा परेको मुद्दामा पेसी सूचीको आठौँ नम्बरमा परेको थियो । ढिला गरी सन्दीपको मुद्दामा सुनुवाइ सुरु भएको छ । काठमाडौं जिल्ला अदालतले दोषी ठहरसहितको फैसला गरेपछि फागुन १० मा सन्दीपले उच्च अदालतलमा पुनरावेदन गरेका थिए । 

पीडित गौशाला २६ (छ)का तर्फबाट सरकारी वकिलले पनि चैत २ मा पुनरावेदन गरेपछि चैत २३ गते न्यायाधीश नृपध्वज निरौला र कृष्णराम कोइरालाको संयुक्त इजलासले विपक्षी झिकाउने आदेश गरी वैशाख ३ गतेको पेसी तोकेको थियो । 

सन्दीपले जिल्ला अदालतको फैसला बदर गरी आफूले सफाई पाउनुपर्ने माग गरेका छन् । तर, सरकारी वकिलले पीडित गौशाला २६ नाबालिग नै रहेको दाबी गर्दै सन्दीपलाई अधिकतम १३ वर्ष सजाय गर्न माग दाबी गरेको छ । 

दुवै पक्षले जिल्ला अदालतको फैसलामा त्रुटि देखाउँदै फैसला बदरको माग गरेका छन् । उच्च अदालतका एक अधिकारीका अनुसार सन्दीपको मुद्दामा चिया समयपछि सुनुवाइ सुरु भएकाले सोमबार फैसला आउने सम्भावना कम छ । 

ती अधिकारीका अनुसार मुद्दा हेर्दाहेर्दैमा राखेर मंगलबार फैसला आउन सक्छ । जिल्ला अदालतको फैसला सदर भए सन्दीप जेल जानु पर्ने छ । गौशाला २६ को तर्फबाट गरिएको माग दाबी पुगेको ठहर उच्च अदालतले गरेमा उनले थप सजाय समेत भुक्तान गर्नुपर्ने छ । तर, सन्दीपको माग दाबी अनुसारको फैसला भएमा भने उनी खेल जीवनमा फर्कन स्वतन्त्र हुनेछन् । 

जिल्ला अदालत काठमाडौंका न्यायाधीश शिशिरराज ढकालको इजलासले सन्दीपलाई आठ वर्ष कैदसहित तीन लाख रुपैयाँ जरिबाना र दुई लाख क्षतिपूर्ति हुने फैसला गरेका थिए । पीडित गौशाला २६ लाई भने ढकालको इजलासले बालिग ठहर गर्दैै सन्दीपले बालिकाको आर्थिक अवस्थाको फाइदा उठाएको ठहर गरेको थियो ।