काठमाडौं । राष्ट्रिय स्वतन्त्र पार्टी (रास्वपा)का सांसद गणेश पराजुलीले राजधानी काठमाडौंका जनताको घरको धारामा पानी होइन मानव मलमूल मिसिएको कालो ढल आउने गरेको गुनासो गरेका छन् । 

सोमबारको प्रतिनिधिसभा बैठकको शून्य समयमा बोल्दै उनले सहरभित्रका नागरिक ढलको पानी धारामा पठाइदिएबापत काठमाडौं उपत्यका खानेपानी लिमिटेड (केयूकेल)लाई शतप्रतिशत बढेको शुल्क तिर्न बाध्य भएको बताए । “म यतिखेर मेरो निर्वाचन क्षेत्र काठमाडौ–७ को महानगरको मुटुमा रहेका वडा नम्बर २५, २६, २४, १७ लगायतका क्षेत्र असन इन्द्रचोकको कुरा गर्दैछु । सहरभित्रका नागरिक ढलको पानी धारामा पठाइदिएबापत केयूकेललाई शतप्रतिशत बढेको शुल्क तिर्न बाध्य छन्, यो कस्तो विडम्बना हो ?,” उनले भने । 

सांसद पराजुलीले यो दुर्दशाको अध्ययन गरी खानेपानी मन्त्रालयले सहरभित्रको खानेपानी वितरण प्रणाली व्यवस्थित बनाएको जानकारी यथाशीघ्र सदनमा गराउन अनुरोध गरे । “झन्डै ३५ अर्बभन्दा बढी खर्च गरिसकेको मेलम्ची परियोजनाको केयूकेएलअन्तर्गत आयोजना कार्यान्वयन निर्देशनालयले उपत्यकाको चक्रपथभित्र ८०५ खानेपानी वितरण प्रणालीको काम सम्पन्न गरी खानेपानी वितरण प्रक्रिया सुरु गरेको भन्छ तर, अधिकांश क्षेत्रमा न त नयाँ प्रणालीबाट पानी वितरण हुन सकेको छ न त पुरानो वितरण प्रणालीको मर्मत सम्भार । यो व्यवस्थापकीय कमजोरी हो या प्राविधिक लापरबाही ?,” उनको प्रश्न थियो ।