काठमाडौं । इन्डियन प्रिमियर लिग (आईपीएल)मा दिल्ली क्यापिटल्सले साविक विजेता चेन्नई सुपर किंग्सविरुद्ध २० रनको जित निकालेको छ । जारी प्रतियोगितामा दिल्लीको यो पहिलो जित हो ।
आइतबार विशाखापटनमस्थित राजाशेखरा रेड्डी मैदानमा दिल्लीले प्रस्तुत गरेको १९२ रनको लक्ष्य पछ्याउने क्रममा चेन्नईले निर्धारित २० ओभरमा ६ विकेट गुमाएर १७१ रन मात्र जोड्न सक्यो ।
चेन्नईका अजिक्या रहानेले ४५ रन बनाए पनि टिमको हार टार्न सकेनन् । अविजित रहेका महेन्द्रसिंह धोनीले ३७, डार्यल मिचेलले ३४, रवीन्द्र जडेजाले अविजित २१ र शिवम दुवेले १८ रन जोडे ।
दिल्लीका मुकेश कुमारले तीन विकेट लिए । खलिल अहमदले दुई र अक्षर पटेलले एक विकेट लिए ।
त्यसअघि, टस जितेर ब्याटिङ रोजेको दिल्लीले २० ओभरमा पाँच विकेट गुमाएर १९१ रन बनाएको थियो ।
दिल्लीका डेविड वार्नरले ५२ रनको योगदान गरे । उनले ३५ बलमा पाँच चौका र तीन छक्का प्रहार गरे । कप्तान ऋषभ पन्तले ३२ बलमा चार चौका र तीन छक्कासहित ५१ रन थपे । पृथ्वी साले ४३ र मिचेल मार्सले १८ रन बनाए ।
चेन्नईका मथिसा पथिरानाले तीन विकेट लिए । रवीन्द्र जडेजा र मुस्तिाफिजुर रहमानले समान एक विकेट हात पारे ।
जितसँगै तीन खेलबाट दुई अंक जोडेको दिल्ली तालिकाको सातौँ स्थानमा उक्लिएको छ । समान खेलबाट चार अंकको चेन्नई दोस्रो स्थानमा छ ।
