काठमाडौं । राष्ट्रिय स्वतन्त्र पार्टी (रास्वपा)का नेताहरूले नेकपा (एमाले)को केन्द्रीय कार्यालयको अध्ययन भ्रमण गरेका छन् ।

आज भएको अध्ययन भ्रमणमा पार्टी महामन्त्री मुकुल ढकाल, केन्द्रीय प्रशिक्षण विभाग सचिव कमल सुवेदी तथा कर्मचारीहरू शुभराज शिल्पकार, सेनु लामालगायतको सहभागिता रहेको थियो ।

"राजनीतिक दल आफू व्यवस्थित हुन सके मात्र देशलाई व्यवस्थित बनाउन सक्दछ । पार्टीको आन्तरिक प्रशासन र व्यवस्थापनले समग्र राजनीतिक परिणाममा समेत प्रभाव पार्ने हुन्छ । तसर्थ राजनीतिक दलको आन्तरिक प्रशासन एवं व्यवस्थापनका बारेमा अध्ययनका लागि राष्ट्रिय स्वतन्त्र पार्टीका पदाधिकारी तथा कर्मचारीले आज एमालेको केन्द्रीय कार्यालयमा आपसी अध्ययन भ्रमण गरेको थियो," रास्वपाले सामाजिक सञ्जालबाट भनेको छ ।

भ्रमणमा एमालेका नेताहरू शंकर पोखरेल, प्रदीप ज्ञवाली, विष्णु रिमालसहितका नेताहरूसँग पार्टी र पार्टी कार्यालयका आन्तरिक व्यवस्थापनका विविध पक्षहरूबारे छलफल भएको छ ।

रास्वपाका नेताहरूले एमाले पार्टी कार्यालयको अवलोकन समेत गरेका थिए ।