काठमाडौं । संयुक्त राष्ट्रसंघको सुरक्षा परिषद्ले गाजामा तत्काल युद्धविराम गर्न आह्वान गरेको छ । राष्ट्रसंघीय सुरक्षा परिषद्ले बिनार्त तत्काल सबै बन्धकलाई रिहा गर्न समेत माग गरेको छ ।
गएको अक्टोबरमा गाजामा युद्ध सुरु भएयता पहिलोपटक सुरक्षा परिषद्को प्रस्ताव पारित भएको हो । अमेरिकाले यसअघि तीनपटक ‘भिटो’ प्रयोग गर्दा युद्धविरामको प्रस्ताव पारित भएको थिएन ।
सोमबार मतदानका क्रममा अमेरिकी प्रतिनिधि अनुपस्थित भएपछि प्रस्ताव पारित भएको हो । सुुरक्षा परिषद्का १५ सदस्यमध्ये अमेरिका मात्र मतदानमा अनुपस्थित थियो । बाँकी १४ सदस्य राष्ट्रले प्रस्तावका पक्षमा मतदान गरे ।
यसले सुरक्षित स्थान भनेर प्यालेस्टाइनी बसेको रफाहसहित गाजामा इजरायलको अन्धाधुन्ध आक्रमणका विषयमा अमेरिका असन्तुष्ट हुँदै गएको संकेत गरेको छ । अमेरिकाले इजरायललाई हतियार र सहायता भने जारी नै राखेको छ ।
इजरायलका रक्षामन्त्रीले गाजामा आफ्ना बन्धक रहेसम्म युद्ध नरोक्ने बताएका छन् । इजरायली प्रधानमन्त्री बेन्जामिन नेतन्याहूको कार्यालयले अमेरिकाले आफ्नो स्थिति फेरेको जनाएको छ ।
नेतन्याहूले इजरायली प्रतिनिधिमण्डल र अमेरिकी अधिकारीबीच वासिङगटनमा यसै हप्ता हुने भनिएको बैठक पनि रद्ध गरेका छन् ।
संयुक्त राष्ट्रसंघका निम्ति प्यालेस्टाइनी प्रतिनिधि रियाद मन्सुरले यो प्रस्तावको स्वागत गरेका छन् ।
गएको अक्टोबर ७ देखि गाजामा इजरायलले गरिरहेको आक्रमणमा ३२ हजार ३३३ भन्दा बढी प्यालेस्टाइनी मारिएका छन् । ७४ हजार ६९४ भन्दा बढी प्यालेस्टाइनी घाइते भएका छन् ।
हमासको आक्रमणबाट अक्टोबर ७ मा इजरायलमा एक हजार १३९ जनाको मृत्यु भएको थियो । दर्जनौँ मानिसलाई हमासले बन्दी बनाएको छ । इजरायलले पनि सयौँ प्यालेस्टाइनीलाई बन्दी बनाएको छ । बीबीसीबाट ।
