काठमाडौं । इलाम–२ का निम्ति एमाले उमेदवार घोषित सुहाङ नेम्वाङले आफू एमालेको मात्र नभई सिंगो जिल्लाको प्रतिनिधित्व गर्ने बताएका छन् । “पार्टीको निर्णयमा एकदमै खुसी छु," पार्टीको निर्णयपछि बाह्रखरीसँगको संक्षिप्त कुराकानीमा सुहाङले भने ।

उनले पार्टीका अग्रजहरूलाई धन्यवाद दिए । ‘‘पार्टीका श्रद्धेय कमरेडलाई धन्यवाद,” उनले भने “उमेदवारका रूपमा आइरहँदा पार्टीको मात्रै नभएर सिंगो इलामको प्रतिनिधित्व गरेर आउनेछु ।”

आइतबारमात्र एमालेको सचिवालय बैठकले इलाम–२ मा सुहाङलाई उमेदवार बनाउने निर्णय गरेको हो ।

सुहाङ संविधानसभाका अध्यक्ष तथा एमालेका तत्कालीन उपाध्यक्ष सुवास नेम्वाङका कान्छा छोरा हुन् । सुवास नेम्वाङको गत भदौ २६ गते निधन भएको थियो ।

उनको निधनपछि रिक्त पदमा वैशाख १५ गते उपनिर्वाचन हुँदै छ । उपनिर्वाचनका लागि यही चैत २४ गते उमेदवारी मनोनयन हुनेछ । एमालेले उमेदवारी मनोनयनको मितिभन्दा १३ दिनअगावै उमेदवार टुंगो लगाएको हो ।

३५ वर्षीय सुहाङ अधिवक्तासमेत हुन् । उनी एमालेको केन्द्रीय कानुन विभागका सदस्य हुन् । एमालेले फागुन ३ गते उनलाई कानुन विभागमा मनोनीत गरेको थियो ।

सुहाङले राजनीतिमा होमिन पार्टीको साथ खोजिरहेका थिए । केही समय अघिबाट उनी इलामका कार्यक्रममा व्यस्त थिए । राजनीतिमा होमिने उनको चाहनाअनुसार पार्टीले उनलाई टिकट दिने निर्णय गरेको हो ।

इलाम जिल्ला कमिटीले सुहाङसहित ६ जनाको नाम सिफारिस गरेको थियो । त्यसबाट सचिवालयले सुहाङलाई उमेदवार बनाउने निर्णय गरेको हो ।

यसअघि उक्त क्षेत्रमा उनका बुबाले जित्दै आएका थिए । आफू कार्यक्रमहरूमा पुग्दा बाबुले पाएको माया आफूले पनि पाएको सुनाए । सकारात्मक प्रतिक्रिया पाएकाले पनि उमेदवार बन्न इच्छा राखेको उनको भनाइ छ ।

“म बुबासँगै राजनीतिक कार्यक्रममा पनि हिँडेको थिएँ । बुबालाई माया गरेर बोलाउनुभएको कार्यक्रममा मलाई पनि बोलाउनुभयो,” उनी भन्छन्, “सबै जनाले  माया देखाउनुभयो, आउनुपर्छ भन्नुभयो । सकारात्मक धारणा देखेकै कारण पनि मैले आउन इच्छा गरेको हो । उहाँहरूको सद्भाव, मायाले सकारात्मक बुझेको छु ।”

पार्टीका उपमहासचिव प्रदीप ज्ञवालीले योग्य व्यक्तिलाई उमेदवार छानेको र समर्थन गर्न अरू पार्टीसँग आग्रह गर्ने बताए ।

सत्ता साझेदार दल राष्ट्रिय स्वतन्त्र पार्टी (रास्वपा)ले पनि उमेदवार उठाउने निर्णय गरिसकेको छ । रास्वापाले सहयोग नगरे स्वस्थ प्रतिस्पर्धा हुने ज्ञवाली बताउँछन् ।

“हाम्रा उमेदवार योग्य हुनुहुन्छ । धेरै हिसाबले डिजर्ब गर्नुहुन्छ । सहयोग गर्नुस् भन्ने हाम्रो अपिल हुनेछ,” उनले भने, “त्यसो नहुँदा कतिपय विषयमा स्वस्थ प्रतिस्पर्धा हुन सक्छ । त्यसलाई अन्यथा ठान्दैनौँ ।”

एमालेले युवा उमेदवारलाई प्राथमिकता दिन पनि सुहाङलाई उमेदवार बनाएको जनाएको छ । ०७९ मंसिर ४ गते भएको निर्वाचनमा प्रत्यक्षतर्फ एमालेका उमेदवार सुवास नेम्वाङले ३० हजार २० मत ल्याएका थिए । 

तत्कालीन सत्ता गठबन्धनका उमेदवार कांग्रेसका डम्बर खड्काले २९ हजार ९०६ मत प्राप्त गरेका थिए । उनीहरूबीचको अन्तर ११४ मत थियो । त्यहाँ नेम्वाङले जित हासिल गर्दै आएका थिए ।  रास्वपाबाट चुनाव लडेका प्रकाश सापकोटाले एक हजार ३८० मत ल्याएका थिए ।