काठमाडौ । नेपाल समाजवादी पार्टी (नेसपा)काे विवाद फेरि चर्किएकाे छ । अध्यक्ष बाबुराम भट्टराईकाे समर्थनबिना अर्का अध्यक्ष महिन्द्रराय यादवसहितका नेताले नेकपा (माओवादी केन्द्र)सँग पार्टी एकताकाे सहमति गरेका छन् ।

शनिबार बालुवाटारमा सहमति भएकाे हाे । पार्टी अध्यक्ष भट्टराई पार्टी एकताकाे विपक्षमा रहँदा सहमति गरेपछि उनी निकटका नेताहरूले माओवादीमा प्रवेश गर्न चाहेकाले संवाद गरेकाे आराेप लगाएका छन् ।

नेसपाका कार्यालय प्रमुख राेशन पाेखरेलले अहिले पार्टीगतरूपमा माओवादीसँग एकताकाे संवाद नै हुन नसक्ने बताए । भट्टराईबिनाकाे बैठककाे औचित्य नरहेकाे उनकाे भनाइ छ ।

"अध्यक्षबिनाकाे बैठककाे कुनै औचित्य छैन । कसैलाई प्रवेश गर्न ग्रसित मनशायले कुरा गरेका हुन सक्छन् । त्याे स्वतन्त्रता त छ ।  तर, अहिलेकै अवस्थामा  नेपाल समाजवादी पार्टी र माओवादीबीच संवादकाे आवश्यकता पनि छैन," उनले भने "माओवादी उल्टाे दिशातिर गइरहेकाे छ । पार्टीगत हिसाबमा कुनै संवाद हुँदैन ।"

भट्टराईले पार्टीकाे कार्यकारिणी समिति बैठक आइतबार र साेमबारका लागि बाेलाएका छन् । तर, यादव पक्षले बैठक नै नरहेकाे भन्दै विज्ञप्ति जारी गरिसकेकाे छ ।

प्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड'को अध्यक्षतामा बसेको बैठकले एकीकृत पार्टीको नयाँ नामका सन्दर्भमा आगामी महाधिवेशनमा टुंगो लगाउने निर्णय गरेको छ ।

पार्टी एकताका लागि वैचारिक एकरूपता र संगठनात्मक तयारी गर्न कार्यदल गठन गरिएको छ । कार्यदलमा नेकपा (माओवादी केन्द्र) को तर्फबाट महासचिव देवप्रसाद गुरुङ र उपमहासचिव जनार्दन शर्मा तथा नेपाल समाजवादी पार्टीका तर्फबाट सहअध्यक्ष गंगानारायण श्रेष्ठ र महासचिव रमेशप्रसाद यादव छन् ।

बैठकमा नेकपा (माओवादी केन्द्र) को तर्फबाट प्रचण्डसहित वरिष्ठ उपाध्यक्ष नारायणकाजी श्रेष्ठ र महासचिव देव गुरुङ तथा नेपाल समाजवादी पार्टीको तर्फबाट अध्यक्ष महिन्द्र राय यादव, सहअध्यक्ष गंगानारायण श्रेष्ठ र महासचिव रमेशप्रसाद यादव सहभागी थिए ।