काठमाडौं । त्रिभुवन अन्तर्राष्ट्रिय विमानस्थल कार्यालयले सुनलगायत भन्सार निरीक्षण र नियन्त्रण गर्ने नागरिक उड्डयन कार्यालयको कार्यक्षेत्र नभएको स्पष्ट पारेको छ । विमानस्थल कार्यालयले सोमबार विज्ञप्ति जारी गर्दै यसबारे स्पष्टीकरण दिएको हो ।
सरकारले भिजिट भिसासम्बन्धी नयाँ व्यवस्था लागु गरेपछि अध्यागमन विभागले थप नयाँ जनशक्तिको व्यवस्था गरेर विमानस्थलमा यात्रु आवागमन व्यवस्थित हुँदै गएको सो कार्यालयले जनाएको छ ।
“पिक आवरमा यात्रु चापका कारण यात्रु चेकजाँचमा केही ढिला हुने गरेको छ,” विज्ञप्तिमा उल्लेख छ, “विशेष अवस्थामा बाहेक विमानहरूको एयर होल्डिङ घटेको छ ।”
प्राधिकरणको विमानस्थल कार्यालयले विमानस्थलको पूर्वाधार सुधारसम्बन्धी कार्य मात्र हेर्दै आएको जनाइएको छ ।
“बढ्दो यात्रु चापलाई मध्यनजर गरेर कार्यालयले भन्सार क्षेत्र विस्तारको कार्य हालै सम्पन्न गरेको छ । जसले गर्दा सेवा प्रवाहमा समेत सुधार देखिएको छ,” विज्ञप्तिमा उल्लेख छ ।
ब्यागेज ह्यान्डलिङ गर्ने नेपाल एयरलाइन्सलाई पनि सेवा प्रवाहमा सुधारका निम्ति ध्यानाकर्षण गराउँदै आएको कार्यालयले जनाएको छ । “पछिल्लो दिनमा ब्यागेज ह्यान्डलिङसम्बन्धी गुनासाहरूमा कमी आएको छ,” विज्ञप्तिमा भनिएको छ ।
विमानस्थमा विगतदेखि थन्किएर रहेका उपकरणलाई समेत क्रमिक प्रयोगमा ल्याइएको कार्यालयले जनाएको छ ।
कार्यालयका अनुसार, चेक इन र प्रस्थान कक्ष विस्तारको कार्य जारी छ । केही महिनामा थप सुधारको महसुस गर्न सकिने विज्ञप्तिमा उल्लेख छ ।
