काठमाडौं । नेकपा (एमाले)का प्रमुख सचेतक तथा सांसद पदम गिरीले बैंक तथा वित्तीय क्षेत्रको बारेमा अफवाह फैलाउनेहरूलाई तत्काल कारबाही गर्नुपर्ने बताएका छन् । 

आइतबार अर्थ समितिको बैठकमा उनले बैंक तथा वित्तीय क्षेत्रलाई असर पार्नेगरी अफवाह फैलाउने बढेको भन्दै त्यस्तालाई कडा कारबाही गर्नुपर्ने बताए । “समस्या सहकारी, माइक्रोफाइनान्स हुँदै बैंकतर्फ आयो । अहिलेको सरकार गैरजिम्मेवार भएर यस्तो अवस्था सृजना भएको हो,” उनले भने, “बैंकहरूप्रति अपवाह फैलाउनेहरूलाई तत्काल हतकडी लगाएर कानुनको दायरामा ल्याउनुपर्छ । त्यस्ता व्यक्तिलाई उन्मुक्ति दिनु हुँदैन ।”

त्यस्तै, बैंकका कर्मचारीलाई पहिला थुन्ने अनि सुन्ने गरेको भन्दै यो गलत भएको बताए । राष्ट्र बैंकको सल्लाहमा सरकारले बैंकका जिम्मेवार पदाधिकारीलाई कारबाही गर्नुपर्ने बताए ।

उनले बैंकहरू पनि आफ्नो व्यावसायिक प्रक्रियामा चुक्ने गरेको पनि बताए । एउटैले बैंकको कर्जा प्रयोग गर्ने प्रवृत्ति भएको भन्दै त्यसलाई सुधार गर्नुपर्ने बताए ।