काठमाडौं । प्रभु बैंकका सिनियर डेपुटी प्रमुख कार्यकारी अधिकृत (डेपुटी सीईओ) मनोज न्यौपानेसहित १० बैंकर्समाथि अनुसन्धान गर्न सात दिनको म्याद थप गरिएको छ । 

हिरासतमा राखेर अनुसन्धान गर्न उच्च अदालत पाटनले म्याद थप गरेको हो । बैंकिङ कसुरमा संलग्न भएको आरोपमा १० बैंकर्स मंगलबार पक्राउ परेका हुन् ।

सेन्चुरी कमर्सियल बैंकबाट कर्जा लिने रवीन्द्र चौलागाईं हाल पुर्पक्षका लागि थुनामा छन् । उनीसमेत आवद्ध कम्पनीहरू पुजा ट्रेडिङ एन्ड मार्केटिङ कम्पनी प्रा.लि., थ्री ब्रदर्स मार्केटिङ प्रा.लि., पुजा मार्केटिङ प्रा.लि. र अन्नपूर्ण डिष्टिलरी प्रा.लि. समेतलाई कर्जा प्रवाह गर्दा धितो स्वरुप बैंकमा कर्जा सुरक्षणबापत राखिने धितोको मूल्यांकन कम गरेर बढी ऋण प्रवाह गरेको भन्दै बैंकर्सलाई पक्राउ गरेको थियो ।

एक अर्ब १४ करोड २३ लाख रुपैयाँको धितोबापत दुई अर्ब ११ करोड ६५ लाख रुपैयाँ कर्जा प्रवाह भएको देखिएको हो । सीआईबीले यस घटनामा संलग्न भएको पाएपछि प्रभु बैंकका सिनियर डेपुटी सीईओ न्यौपानेसहित सेन्चुरीका तुलसीराम गौतम, सविन घिमिरे, सुवासबहादुर श्रेष्ठ, अनुपमा श्रेष्ठ प्रधान, सुनील बस्नेत, दिलीप बराल, दिपेश प्रधान, राजेश भण्डारी र रमण श्रेष्ठ पक्राउ परेको थियो । प्रभु बैंकले सेन्चुरीलाई प्राप्त गरेपछि यी सबै प्रभु बैंकमा आएका थिए ।

मनोज, दिपेश र राजेश प्रभु बैंकमा उच्च तहमा कार्यरत छन् । तुलसीराम सेन्चुरी बैंकका पूर्वसीईओ हुन् ।