काठमाडौं । प्रतिनिधिसभा बैठकमा बिहीबार सांसद मुक्ताकुमारी यादवले नेपाल मेडिकल काउन्सिलको पछिल्लो लाइसेन्स परीक्षामा '२२ जना परीक्षार्थी छुटेको' दाबीसहित प्रश्न उठाइन् । काउन्सिलले परीक्षाको मिति अगाडि सारेकै कारण विद्यार्थी परीक्षा दिनबाट वञ्चित भएको तर्क थियो ।

“बाइस जना विद्यार्थीलाई लाइसेन्स परीक्षाबाट वञ्चित गरिएको छ । कुनै पनि परीक्षाको मिति सार्नुपर्दा अगाडि सारिन्छ । पश्चात्‌दर्शी कानुन बनाउन पाइन्छ ?,” सांसद यादवको प्रश्न थियो ।

सांसद यादवको तर्कलाई नेपाल मेडिकल काउन्सिलले भने गलत भनेको छ । काउन्सिलका निमित्त रजिस्ट्रार डा. विश्वराज दवाडीले परीक्षामा २२ जना छुटेको नभई ‘अनुपस्थित भएको’ बताए ।

“परीक्षामा आवेदन दिएका २१ जना अनुपस्थित भएका हुन्, एकजनाले पछिल्लो सूचना नहेरेको बताएका थिए, कुनै परीक्षार्थी छुटेका होइनन्,” उनले बाह्रखरीसित भने ।

भएको के थियो ?

काउन्सिलको नियमित परीक्षा तालिका अनुसार स्नातक तह मेडिकल र डेन्डलर्फ चिकित्सक दर्ता (६८औँ लाइसेन्स) को परीक्षा मिति माघ १७ देखि १९ गतेलाई तय गरेको थियो ।

परीक्षा आवेदनका लागि पुस २ देखि माघ ४ गतेसम्म अनलाइन फर्म खुला गरिएको थियो । परीक्षार्थीको संख्या धेरै भएको कारण खुलाउँदै काउन्सिलले माघ १० गते परीक्षाको दिन थपिएको सूचना जारी गर्‍यो ।

माघ १७ गतेदेखि हुने भनिएको परीक्षा एक दिन अगाडि १६ गतेदेखि नै सञ्चालन गर्ने निर्णय काउन्सिलको माघ ५ गतेको पूर्ण बैठकले गरेको थियो ।

सो सूचना अहिले पनि काउन्सिलको आधिकारिक फेसबुकमा देख्न सकिन्छ । सूचनाअनुरूप माघ १६ देखि १९ सम्म सात सिफ्टमा परीक्षा भएको थियो । परीक्षामा मेडिकल र डेन्डल दुवै गरी  दुई हजार २२ जना सहभागी भएको र एक हजार १४६ जना उत्तीर्ण भएको काउन्सिलले जनाएको छ । 

आवेदन दिएकामध्ये २२ जना परीक्षामा उपस्थित नभएको र एक जनाले भने आफूले परीक्षा मिति थपेको थाहा नपाएको भनी माघ १८ गते सम्पर्कमा आएको निमित्त रजिस्ट्रार डा. दवाडीले बाताए ।