काठमाडौं । चालु आर्थिक वर्ष २०८०/०८१ को सात महिनामा नेपालको वैदेशिक व्यापार घाटा आठ खर्ब ११ अर्ब ११ करोड रुपैयाँ नाघेको छ ।

अघिल्लो आर्थिक वर्ष २०७९/०८० को सात महिनामा नेपालको व्यापार घाटा आठ खर्ब २५ अर्ब ७३ करोड रुपैयाँ थियो । यो अवधिमा नेपालले आठ खर्ब ९७ अर्ब ९४ करोड रुपैयाँभन्दा बढीको वस्तु आयात गरेको छ ।

गत वर्षको तुलनामा यस वर्ष आयात २.३१ प्रतिशतले घट्दा व्यापार घाटा पनि केही कम देखिएको छ ।

यस वर्ष नेपालले सात महिनामा ८६ अर्ब ८३ करोड रुपैयाँको मात्रै निर्यात गरेको छ । गत आर्थिक वर्षको यसै अवधिमा गरेको निर्यात ९३ अर्ब ४३ करोड रुपैयाँभन्दा बढी थियो । निर्यातमा यस वर्ष ७.०७ प्रतिशतको गिरावट देखिएको छ ।

भन्सार विभागले बुधबार सार्वजनिक गरेको सात (साउन–माघ) महिनासम्मको वैदेशिक व्यापारको विवरणानुसार यो अवधिमा नेपालको कुल वैदेशिक व्यापार ९ खर्ब ८४ अर्ब ७७ करोड रुपैयाँ नाघेको छ । गत वर्षको यसै अवधिमा नेपालको वैदेशिक व्यापार १० खर्ब १२ अर्ब रुपैयाँभन्दा बढीको थियो ।