काठमाडौं । सत्तासाझेदार दल नेपाली कांग्रेसका सांसद हृदयराम थानीले देश किर्ते हुनबाट रोक्न कसै न कसैले पहल लिनुपर्ने बताएका छन् । उनले यो कार्यमा गृहमन्त्रीले अग्रसरता लिनुपर्ने धारणा राखे ।

प्रतिनिधिसभाअन्तर्गतको राज्यव्यवस्था तथा सुशासन समितिको आइतबारको बैठकमा उनले अध्यागमन देशको अनुहार भएको टिप्पणी गरे । अध्यागमनले कमजोरी गर्दा देशको इज्जत धुमिल हुने उनले बताए ।

विमानस्थलमा कर्मचारी र प्रहरी भिडेको र गृहसहित मिलेर विषय टालटुल गरिएको भन्दै उनले यसको स्थायी समाधान के हो ? कि खोज्नै नपर्ने हो ? भनी गृहमन्त्री नारायणकाजी श्रेष्ठसित प्रश्न गरे ।

“बैंक, विश्वविद्यालय, स्थानीय तह सबै बागबजारमा छ भने गृह मन्त्रालय पनि बागबजारमै छ भनेर मैले भने के हुन्छ ?,” उनले भने, “गृहमन्त्री थाहा छ, झन्डा हल्लाइरहनुभएको छ । एकपटक भेटेको छु । तपाईंको इज्जत त राम्रै छ । तर, किन खुट्टा कमाएको ? तपाईंको खुट्टा किन काम्न थाल्यो ?”

उनले थपे, “हान्नुस् न, जो जान्छ जाओस् । हामी जान्छौँ भने जाऔँ । तपाईं नै जानुहुन्छ भने जानुहोस् । सभापतिजी हाँस्नुभयो, रवि लामिछानेजी हाँस्नुभयो । बुझेर हाँस्नुभएको हो । म त यहीँ बसेर बुझ्दै छु ।”