काठमाडौं । नेपालमा खनिज पदार्थको उत्खननका निम्ति खानी तथा भूगर्भ विभागले १५६ खानीलाई अनुमति प्रदान गरेको छ । मुलुकभर खनिज पदार्थको अनुसन्धान तथा अन्वेषण गरी उत्खननका निम्ति ती खानीलाई स्वीकृति प्रदान गरिएको हो ।

विभागले खानी तथा खनिज पदार्थसम्बन्धी ऐन, २०४२ र खानी तथा खनिज पदार्थ नियमावली, २०५६ अन्तर्गत विभिन्न १७ प्रकृतिका १५६ खानीलाई उत्खननका लागि अनुमति प्रदान गरिएको विभागअन्तर्गत खनिज सम्पदा महाशाखाका प्रमुख जयराज घिमिरेले जानकारी दिए । नेपालको अर्थतन्त्रको मेरुदण्डका रूपमा रहेकाले उत्खननका निम्ति अनुमति प्रदान गरिएको उनको भनाइ थियो ।

मुलुकको आर्थिक विकास र समृद्धिका निम्ति महत्त्वपूर्ण क्षेत्रका रूपमा लिइएको खनिज पदार्थमध्ये सबैभन्दा धेरै चुनढुंगा ९६ खानीलाई उत्खननका लागि अनुमति दिइएको महाशाखाका प्रमुख घिमिरेले जानकारी दिए ।

उनका अनुसार, अनुमति प्रदान गरिएकामा टुर्मालिन तीन, टल्क १३, क्वार्ज दुई, काइनाइट पाँच, मार्बल एक, रातोमाटो दुई, फलाम एक, जिंक एक, क्वार्जजाइट १३, म्याग्नेसाइट दुई, डोलोमाइट तीन र तामाका दुई खानी रहेका छन् ।

घिमिरेले पछिल्लो समय चुनढुंगा उत्खननका लागि धेरै आवेदन परेको र सोहीअनुसार ९६ खानीलाई अनुमति प्रदान गरिएको जानकारी दिए ।

पछिल्लो समय नेपालमा उत्पादित सिमेन्ट समेत विभिन्न मुलुकमा निर्यात हुँदै आएको छ । “नयाँ संरचना निर्माणका लागि सिमेन्टको अत्यधिक माग भइरहेको अवस्थामा सिमेन्टमा चाहिने महत्त्वपूर्ण कच्चापदार्थ चुनढुंगाको उत्खनन बढेको हो,” उनले भने ।

यस्तै, विभागले अनुमतिपत्र प्राप्त गरेका विभिन्न कम्पनीलाई उत्खनन कार्य समयमा सुरु नगरेको भन्दै रद्द गर्दै आएको छ । रासस