काठमाडौं । अमेरिकाको माथिल्लो सदन सिनेटले युक्रेन र इजरायललाई सहायता प्रदान गर्न ११८ अर्ब डलरको सम्झौता सार्वजनिक गरेको छ ।
अमेरिकी राष्ट्रपति जो बाइडेन र दुवै दल डेमोक्रेट एवं रिपब्लिकन नेताले यो सहायताका लागि जोड दिइरहेको बताइएको छ ।
यो सम्झौतामा आप्रवासी भित्रिने मेक्सिकोको सीमामा कडाई गर्न र लागुऔषध तस्करीविरुद्धका लागि करिब २० अर्ब डलर छुट्याइएको छ ।
आइतबार सार्वजनिक यो बजेटमध्ये ६० अर्ब डलर युक्रेनलाई सहायता प्रदान गर्न छुट्याइएको छ ।
यस्तै, इजरायललाई १४.१ अर्ब डलरको सहायता र लाल सागरमा हुथीविरुद्ध सुरक्षा अवस्था बलियो बनाउन २.४४ अर्ब डलर छुट्याइएको छ ।
चीन र ताइवानबीचको तनावलाई लिएर एसियाली साझेदारलाई सहयोग स्वरुप ४.८३ अर्ब डलर छुट्याइएको अल्जजिराले उल्लेख गरेको छ ।
सिनेटका अध्यक्ष चक सुमरले सम्झौतामा बुधबार मतदान हुने अपेक्षा गरेका छन् ।
तल्लो सदनका सभामुख माइक जोन्सनले भने यो प्रस्ताव पारित नहुने प्रतिक्रिया दिएका छन् ।
