काठमाडौं । विशेष अदालतले नागरिक उड्डयन महाशाखाका उपसचिव प्रमोद नेपाललाई भ्रष्टाचारी ठहर गरेको छ । 

प्याराग्लाइडिङको इजाजत दिनका लागि ६ लाख घुस लिएका नेपाल हात्तीसारको अरन्य होटेलको कम्पाउन्डबाट पक्राउ गरेका थिए । प्राविधिक उपसचिव नेपाललाई विशेष अदालतले शुक्रबार ६ लाख जरिबाना र एक वर्ष कैद हुने फैसला गरेको छ । 

उपसचिव नेपालको साथबाट त्यसबेला थप १६ लाख ५० हजार रुपैयाँ फेला परेकोमा अनुसन्धान गर्दा बीबी एयरवेजका प्रमुख कार्यकारी अधिकृत हरिभक्त श्रेष्ठले ऋण दिएको खुलेको थियो । अख्तियारले उक्त रकम जपथ जफत गर्ने अनुमति माग्दै व्यावसायिक लाभका लागि ऋण दिने श्रेष्ठलाई समेत कारबाही दाबी गर्दै ०७९ असोज २ गते मुद्दा दायर गरेको थियो । 

विशेष अदालतका अध्यक्ष न्यायाधीश टेकनारायण कुँवर तथा सदस्यहरू रामबहादुर थापा र मुरारीबाबु श्रेष्ठको इजलासले शुक्रबार फैसला गरी बीबी एयरवेजका श्रेष्ठलाई भने सफाइ दिएको छ ।