काठमाडौं । लक्ष्मी सनराइज बैंक र अपर सेती हाइड्रो प्रालिबीच २० मेगावाट क्षमताको माथिल्लो सेतीखोला जलविद्युत् आयोजना निर्माणमा लगानी गर्ने सम्झौता भएको छ । बैंकले सो कम्पनीले निर्माण गर्ने सेतीखोला जलविद्युत् आयोजनामा लगानी गर्ने सम्झौता गरिएको हो ।

सो आयोजनाको कुल लागत चार अर्ब दुई करोड रुपैयाँ अनुमानित छ । यो सहकार्यले नेपालको नवीकरणीय ऊर्जा परिदृश्यमा महत्त्वपूर्ण भूमिका खेल्ने बैंकको भनाइ छ ।

अपर सेती हाइड्रोले ०७८ माघ १७ गते विद्युत् विकास विभागबाट विद्युत् उत्पादनको अनुमतिपत्र लिएको र ०८० असोज १० मा नेपाल विद्युत् प्राधिकरणसँग विद्युत् खरिद–बिक्री सम्झौता समेत गरिसकेकोे छ । सो कम्पनीको प्रवर्द्धकका रूपमा नेपालको प्रतिष्ठित व्यापारिक घराना केसी ग्रुप रहेको छ ।

सो आयोजना निर्माणका निम्ति लक्ष्मी सनराइज बैंक एक्लैले परियोजना लागतको ७५ प्रतिशत लगानी गर्ने प्रतिबद्धता जनाएको छ । बाँकी २५ प्रतिशत रकम सो कम्पनीका प्रवर्द्धक÷संस्थापकको लगानी रहने जनाइएको छ ।