पोखरा । तनहुँको व्यास नगरपालिकामा पुनः मतगणना गर्नुपर्ने माग गरिएको रिटमाथि उच्च अदालत पोखरामा सुनुवाइ जारी छ । उच्चका न्यायाधीशद्वय मिलनकुमार राई र धनसिंह महराको संयुक्त इजलासमा मंगलबार सुनुवाइ सुरु भएको हो ।

०७९ वैशाखमा भएको स्थानीय तह निर्वाचनमा व्यास नगरपालिकाको प्रमुखमा स्वतन्त्र उमेदवार बनेका दीपकराज जोशीले सोही वर्ष जेठ १२ गते रिट दायर गरेका थिए । मतगणनामा धाँधली भएको भन्दै पुनः गणना गर्नुपर्ने माग उनले रिटमा गरेका छन् ।

जोशी नेपाली कांग्रेसका उमेदवार वैकुण्ठनाथ अर्यालसँग पराजित भएका थिए । उनले नेकपा (एमाले)को सहयोग पाएका थिए । कांग्रेसका न्यौपानेसँग २५२ मतान्तरले पराजित भएसँगै जोशीले निर्वाचन परिणामप्रति प्रश्न उठाएका थिए ।

त्यति बेला पुनः मतगणनाका निम्ति उनले मुख्य निर्वाचन अधिकृतको कार्यालयमा उजुरी दिएका थिए । निर्वाचन आयोगबाट न्याय नपाएको भन्दै जोशी अदालत गएका हुन् ।

उनले मुख्य निर्वाचन अधिकृतको कार्यालय तनहुँ, जिल्ला निर्वाचन कार्यालय तनहुँ, निर्वाचन आयोग र निर्वाचित नगर प्रमुख न्यौपानेलाई विपक्षी बनाएका छन् ।