काठमाडौं । राष्ट्रिय स्वतन्त्र पार्टी (रास्वपा)की सांसद डा. तोसिमा कार्कीले जाजरकोट अस्पतालबारे भ्रम सिर्जना गर्न खोजेको भन्दै आपत्ति जनाइएको छ । 

प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिको सोमबारको बैठकमा डा. कार्कीले बोलेको विषयलाई लिएर नेकपा (माओवादी केन्द्र)की सांसद ज्ञानु बस्नेत सुवेदीले आपत्ति जनाएकी हुन् ।  

डा. कार्कीले जाजरकोटको नलगाडमा नयाँ अस्पताल आवश्यक नभएको धारणा बैठकमा राखेकी थिइन् । 

“जाजरकोट जिल्ला अस्पतालसँग एक घण्टाको दुरीमा रहेको नलगाडमा २२ करोड खर्च गरेर अस्पताल बनाउन सुरु गरिँदैछ रे, त्यो २२ करोड अहिले इन्भेस्ट गर्नु जरुरी नै छैन । त्यसको चार करोड जिल्ला अस्पतालमा हाल्नुस् न त्यहाँ उपकरण हालौँ, जनशक्ति हालौँ र त्यही अस्पताललाई सञ्चालन गरौँ” डा. कार्कीले बैठकमा भनेकी थिइन् । 

डा. तोसिमाको अभिव्यक्ति भ्रमपूर्ण र स्टनबाजीको रूपमा आएको सांसद बस्नेतले आरोप लगाइन् । 

“उहाँले भनेजस्तो सदरमुकामबाट एक घण्टा दुरीमा होइन धेरै विकट पालिका हो नलगाड, र डोल्पासँग पनि जोडिएको छ । बर्खामा गाडी चल्ने अवस्था हुँदैन । अस्थायी टहरा बनाउने क्रममा भीरबाट लडेर अस्पतालसम्म पुग्न नसकेको हामीले नै सुनेका हौँ, अनि त्यस्तो ठाउँमा अस्पताल आवश्यक छैन भनेर समितिमा भ्रम सिर्जना गर्न मिल्छ ?” सांसद बस्नेतले भनिन् । 

जाजरकोट जिल्ला अस्पतालमा डा. कार्कीले कुनै एनजीओको सहयोगमा जनशक्तिको व्यवस्थापन गरिदिएको विषयलाई स्टनबाजी गर्नु आवश्यक नरहेको भन्दै सांसद बस्नेतले आलोचना समेत गरिन् । 

“नलगाडमा आवश्यक छैन भन्नु पूर्वाग्रहपूर्ण छ, यसमा म आपत्ति जनाउन चाहन्छु र समितिमा भ्रम सिर्जना हुनेगरी राख्नु जरुरी छैन,” सुवेदीले समितिमा भनिन् ।