काठमाडौं । चालु आर्थिक वर्ष २०८०/८१ को ६ महिनामा एनआईसी एसिया बैंकको नाफा ४१.८४ प्रतिशतले घटेको छ ।

बैंकले आइतबार सार्वजनिक गरेको दोस्रो त्रैमाससम्मको अपरिष्कृत वित्तीय विवरणअनुसार ६ महिनामा एक अर्ब ९० करोड ३८ लाख रुपैयाँ नाफा आर्जन गरेको हो । गत वर्षको सोही अवधिमा बैंकले तीन अर्ब २७ करोड ३३ लाख रुपैयाँ नाफा आर्जन गरेको थियो ।

खराब कर्जा बढ्न र ब्याज आम्दानी घट्न पुग्दा बैंकको नाफामा असर परेको हो । वित्तीय विवरणअनुसार पुस मसान्तसम्म बैंकको खराब कर्जा १.९० प्रतिशत कायम भएको छ । गत वर्षको सोही अवधिसम्म बैंकको खराब कर्जा ०.६१ प्रतिशत थियो ।

बैंकको खुद ब्याज आम्दानी १० प्रतिशतले घटेको छ । गत वर्षको पुस मसान्तसम्म ६ अर्ब १६ करोड ५९ लाख रुपैयाँ खुद ब्याज आम्दानी गरेको बैंकले चालु आर्थिक वर्षको सोही अवधिमा पाँच अर्ब ५४ करोड १४ लाख रुपैयाँ खुद ब्याज आम्दानी गरेको छ ।

बैंकले लिन फि तथा कमिसन बापतको रकम भने वृद्धि भएको छ । बैंकले चालु आर्थिक वर्षको दोस्रो त्रैमासम्म फि तथा कमिसन बापत एक अर्ब २० करोड ९१ लाख रुपैयाँ आर्जन गरेको छ । गत वर्षको सोही अवधिमा बैंकले एक अर्ब तीन करोड ९२ लाख रुपैयाँ खुद फि तथा कमिसन आर्जन गरेको थियो ।

बैंकको सञ्चालन मुनाफा पनि घटेको छ । उक्त शीर्षकमा बैंकले तीन अर्ब ५६ करोड १० लाख रुपैयाँ आर्जन गरेको छ । बैंकको कर्जा लगानी तथा निक्षेप संकलन भने बढेको छ । कर्जा लगानी १२ प्रतिशतले वृद्धि भएको छ भने निक्षेप संकलन २२ प्रतिशतले वृद्धि भएको छ ।

हाल बैंकको चुक्तापुँजी १४ अर्ब ९१ करोड ७५ लाख रुपैयाँ छ । बैंकले पुस मसान्तसम्म जगेडा कोषमा १६ अर्ब २७ करोड ६ लाख रुपैयाँ सञ्चित गरेको छ । बैंकको वितरणयोग्य मुनाफा भने ५९ करोडभन्दा बढी ऋणात्मक छ ।