काठमाडौं । यमनको हुथी सशस्त्र समूहले सोमबार अडेनको खाडीमा अमेरिकी जहाजमा गरिएको आक्रमणको जिम्मेवारी लिएको छ । हुथी सेनाका प्रवक्ता याह्या सारियाले सो अमेरिकी जहाजमा गरिएको आक्रमणको जिम्मेवारी आफूहरूले लिएको बताए ।

हुथी समूहले अब देशविरुद्धको आक्रामकतामा भाग लिने सबै अमेरिकी र बेलायती जहाज र युद्धपोतहरूलाई शत्रुतापूर्ण लक्ष्यका रूपमा लिने उनले चेतावनी दिए ।

यसैबीच, समूहका प्रमुख वार्ताकार मोहम्मद अब्दुल सलामले इजरायल जाने जहाजहरूमा समूहको आक्रमण जारी रहने बताए । उनले हुथीले आफ्नो स्थिति स्पष्ट गर्न अन्तर्राष्ट्रिय समुदायसँग कुराकानी गरिरहेको बताए । इजरायल जानेबाहेक सबै जहाजहरूका निम्ति ‘नेभिगेसन’ सुरक्षित रहेको उनले उल्लेख गरे ।

आफ्नो समूहले थप द्वन्द्व नखोजेको र अमेरिका बेलायतले लालसागरलाई अझ खतरनाक बनाएको आरोप उनले लगाए ।

एक यमनी सरकारी अधिकारीले नाम नछाप्ने सर्तमा सरकारले हुथीहरूले प्रहार गरेका क्षेप्यास्त्र पनि पत्ता लगाएको र तिनीहरूमध्ये केहीले आफ्नो लक्ष्य गुमाएर दक्षिणी यमनका पहाडहरूमा खसेको बताए । असफल प्रक्षेपणले त्यहाँका बासिन्दालाई आतंकित बनाएको भए पनि कसैलाई चोटपटक नलागेको उनको भनाइ छ ।

यमन सन् २०१४ देखि विनाशकारी गृहयुद्धमा फसेको छ । हुथीहरूले अन्तर्राष्ट्रिय रूपमा मान्यताप्राप्त यमनी सरकारविरुद्ध लडिरहेका छन् । साउदी अरेबिया नेतृत्वको गठबन्धनले २०१५ मा यमनी सरकारको समर्थनमा द्वन्द्वमा हस्तक्षेप गरेको थियो । सिन्ह्वा/न्युज एजेन्सी नेपाल