काठमाडौं । राष्ट्रिय स्वतन्त्र पार्टी (रास्वपा)का प्रमुख सचेतक सन्तोष परियारले संक्रमणकालीन न्यायसँग सम्बन्धित विधेयक सहमतिबाट टुंग्याउने ठाउँमा पुगिसकेको बताएका छन् । बिहीबार सिंहदरबारमा बसेको कानुन, न्याय तथा मानवअधिकार समितिको बैठकमा उनले यस्तो बताएका हुन् ।

उनले राजनीतिक दलहरू सहमितको धेरै नजिक पुगिसकेको र केही विषयमा अझै छलफल गरी टुंग्याउनुपर्ने आवश्यकता रहेको औँल्याए । अप्ठ्यारो महसुस गरिएको ठाउँमा उदारता देखाएर भए पनि विधेयक टुंग्याउनुपर्नेमा उनले जोड दिए ।

“हामी धेरै नै नजिक भइसकेका छौँ । यो टुंग्याउने ठाउँमा पुगिसकेका छौँ । बाँकी जो छन्, यसमा पनि छलफल गरेर एक ठाउँमा लैजान सकिन्छ,” उनले भने ।

राष्ट्रिय प्रजातन्त्र पार्टी (राप्रपा)का सांसद ध्रुवबहादुर प्रधानले संक्रमणकालीन न्यायसँग सम्बन्धित विधेयक सहमतिबाटै टुंगो लगाउनुपर्ने बताए । उनले विधेयकलाई पार्टीगत रूपमा मात्र लिएर बुझ्न नहुने उल्लेख गरे ।

“...पार्टीका सिद्धान्तहरू फरक–फरक हुन्छन्, त्यसभन्दा माथि उठेर गर्नुपर्छ । अझै पनि दुई महिना थपौँ, टुंग्याऔँ,” उनले भने । न्युज एजेन्सी नेपाल