काठमाडौं । सत्तासाझेदार दल नेकपा (एकीकृत समाजवादी)को सचिवालय बैठकमा नेताहरूले राष्ट्रियसभा सदस्य उमेदवारको मापदण्ड बनाउन माग गरेका छन् । आइतबार पार्टी कार्यालय आलोकनगरमा बसेको बैठकमा निर्वाचन हारेका र लाभको पदमा पुगेका व्यक्ति उमेदवार बन्न नपाउने गरी मापदण्ड बनाउनुपर्नेमा जोड दिइएको हो ।

“चुनाव हारेका र पटक–पटक लाभको पदमा पुगेका व्यक्तिहरूलाई उमेदवार नबनाऔँ, उमेदवारको मापदण्ड तोकेर जाऔंँ भन्ने कुरा उठेको हो । तर, उमेदवारबारे निर्णय गर्ने अधिकार तीन नेतालाई नै दिइएको छ,” उपाध्यक्ष केशवलाल श्रेष्ठले बाह्रखरीसित भने ।

• एकीकृत समाजवादीमा उमेदवार छान्ने जिम्मा तीन नेतालाई

राष्ट्रियसभामा रिक्त हुन लागेका मध्ये एकीकृत समाजवादीले दुई सिट पाउने सहमति सत्ता गठबन्धनमा आबद्ध दलबीच भएको छ । गठबन्धनभित्र क्लष्टरको टुंगो नलाग्दा एकीकृत समाजवादीका तर्फबाट उमेदवार भने तय गरिएको छैन ।

पार्टीका तर्फबाट उमेदवारको टुंगो लगाउने जिम्मेवारी अध्यक्ष माधवकुमार नेपाल, उपाध्क्ष राजेन्द्र पाण्डे र महासचिव घनश्याम भुसाललाई दिइएको छ । उमेदवारबारे आजै साँझसम्म टुंगो लगाउने तयारी छ ।

स्रोतका अनुसार, नेताहरू केशवलाल श्रेष्ठ, प्रमेश हमाल, गंगालाल तुलाधर, विजय पौडेल, घनेन्द्र बस्नेत, दिलु पन्तलगायत नाम छलफलका क्रममा प्रस्ताव गरिएको छ । तर, गठबन्धनमा प्रदेश र क्लष्टर टुंगिएपछि सोही आधारमा निर्णय गरिने बताइएको छ ।