काठमाडौं । परराष्ट्रमन्त्री एनपी साउदले आफूले गरिरहेका कामको विवरण प्रस्तुत गरेका छन् । पार्टी कार्यालय सानेमा शुक्रबारको केन्द्रीय समिति बैठकमा उनले मैत्रीराष्ट्रसँगको सम्बन्ध सुदृढ रहेको बताए । 

“वर्तमान सरकारले संयुक्त राष्ट्र संघको वडापत्र, असंलग्नता र पञ्चशीलका सिद्धान्त, विश्व शान्ति एवम् अन्तर्राष्ट्रिय कानुनका सिद्धान्तका आधारमा परराष्ट्र नीति सञ्चालन गर्दै आएको छ,” उनले बैठकमा भने, “यस अवधिमा सार्वभौमिक समानता, पारस्परिक हित र लाभका आधारमा स्वतन्त्र र सन्तुलित परराष्ट्र नीति सञ्चालन भई छिमेकी लगायत विश्वका सबै मित्र राष्ट्रहरूसँगको मैत्रीपूर्ण सम्बन्ध थप सुदृढ भएका छन् ।”

उनले बैठकमा राहदानी सेवा व्यवस्थित गरिएको जानकारी गराए । एक महिनाका लागि अग्रिम अनलाइन आवेदन फाराम खोल्न सुरु गरिएको उनको भनाइ छ । 

“यसबाट राहदानीका लागि सेवाग्राहीको भिड उल्लेख्य मात्रामा घटाउन सकिएको,” भने, “फाराम अस्वीकृत हुने समस्या सम्बोधन गरिएको छ ।”

विदेशमा रहेका नेपालीहरूको हकहित संरक्षणमा मन्त्रालय, मातहतका विभाग तथा विदेशस्थित नियोगहरू परिचालित रहेको उनले बताए । विदेशमा समस्यामा परेका नेपालीको समस्या समाधान, कानूनी उपचार, तथा उद्धारका कार्यलाई प्राथमिकताका साथ सञ्चालन गरिएको जानकारी गराए ।

श्रम गन्तव्य भएका युरोपेली मुलुकहरूमा समेत नेपाली राजदूतावास खोल्ने विषयमा प्रारम्भिक छलफल भइरहेको उनले बताए । उनले ४९ बुँदे विवरण बैठकमा प्रस्तुत गरेका थिए ।