काठमाडौं । राष्ट्रिय स्वतन्त्र पार्टी (रास्वपा)की सांसद तोसिमा कार्कीले एनसेलको सेयर खरिद–बिक्री प्रकरणमा राज्य र जनतालाई ठग्ने काम भएको बताएकी छन् । प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको बिहीबारको बैठकमा उनले नियामक निकायको कार्यप्रति पनि असन्तुष्टि जनाइन् ।

“राज्यलाई ठग्ने काम भएको छ । जनतालाई ठग्ने काम भएको छ,” उनले भनिन्, “यो सबैको विषय हो । नियामक निकायको प्रस्तुति एकदमै चित्तबुझ्दो भएन ।”

नियामक निकाय हुँदाहुँदै एनसेल प्रकरणमा अर्को छानबिन समिति किन गठन गरियो भन्दै उनले प्रश्न गरिन् ।

“कति धेरै नियामक निकाय छन् । यति हुँदाहुँदै अर्को छानबिन समिति किन गठन भयो ? यस्ता पहिले धेरै भए । अहिलेको कसरी भयो ?,” उनले प्रश्न गरिन्, “कन्फ्लिक्ट अफ इन्ट्रेस्ट छ कि छैन ? नियामक निकायलाई किन राखिएन ? पन्छाउन खोजेको हो कि !”

• सांसदले भने– समितिमा चलखेल हुन थाल्यो, नकचराहरूको देश छ

बैठकमा नेपाली कांग्रेसका सांसद बद्री पाण्डेले राज्यसंयन्त्र कमजोर भएको बताए । “संयन्त्र यति कमजोर भयो कि कुकुरले पुच्छर हल्लाउने कि पुच्छरले कुकुरले हल्लाउने, त्यसैले होला यस्तो भइरहेको,” उनले भने, “नियामक निकायलाई मिडियाबाट थाहा हुने । यो हुँदा उनीहरू कमजोर छन् या बदनियत छ भन्ने हुन्छ ।”

राष्ट्र ठगिएको उनले बताए । गिरोह मोटाउने प्रवित्ति देखिएको उनको भनाइ छ । “यहाँनिर राष्ट्र ठगिएको छ । गिरोह मोटाउने प्रवित्ति देखिएको छ,” उनले भने, “त्यसैले छानबिनको निष्कर्षमा पुग्नुपर्छ । यहाँ कमायो, अन्तिममा यहाँ लगानीको वातावरण छैन भन्नुले देशले कति घाटा व्यहोर्नुपर्ने हो ।”

एनसेलको सेयर खरिद–बिक्रीबारे छानबिन गर्न गठित उच्चस्तरीय समितिले उचित निष्कर्ष दिनुपर्नेमा उनले जोड दिए । “यो समितिले उचित निष्कर्ष दिएन भने, न्यायिक निरूपण गरेन भने, दुष्प्रभावित भयो भने हामी संसदीय समिति गठन गर्न बाध्य पर्नेछौँ,” उनले भने, “समितिले अहिले सहयोग गरौँ ।”