काठमाडौं । राष्ट्रपति रामचन्द्र पौडेलले संघीय लोकतान्त्रिक गणतन्त्रात्मक व्यवस्थामा कुनै आँच आउन नदिने प्रतिबद्धता व्यक्त गरेका छन् ।

शनिबार नेपाल उद्योग परिसंघ कोसी प्रदेशले विराटनगरमा आयोजना गरेको कार्यक्रममा उनले संविधानप्रदत्त भूमिका निष्ठापूर्वक पालना गर्ने र संघीय लोकतान्त्रिक गणतन्त्रात्मक व्यवस्थामा कुनै आँच आउन नदिने प्रतिबद्धता व्यक्त गरेका हुन् ।

राष्ट्रपति पौडेलले भने, “म तपाईंहरूलाई के विश्वास दिलाउन चाहन्छु भने कि मेरो तागतले भ्याएसम्म र म रहेसम्म संघीय लोकतान्त्रिक गणतन्त्रमाथि कुनै आँच आउन दिने छैन ।”

उनले समाजवादउन्मुख अर्थव्यवस्थाको आधार निर्माण गर्न उद्योगी–व्यवसायीको महत्त्वपूर्ण भूमिका हुने बताए । अर्थतन्त्र सुधारका निम्ति सरकारले तर्जुमा गरेको रणनीति, निजी क्षेत्रको सहयोग, विदेशी मुद्रा सञ्चिति, विप्रेषण वृद्धिदरका साथै शोधानन्तर बचत सकारात्मक भए पनि सन्तुष्ट हुने स्थान नरहेको उल्लेख गरे । उनले अर्थतन्त्रको सुधारका निम्ति सरकार निरन्तर लागेको आफूले पाएको बताए ।

कार्यक्रममा कोसी प्रदेशका प्रमुख परशुराम खापुङले देश विकासमा निजी क्षेत्रको अहम् भूमिका हुने भएकाले राज्यले उनीहरूबाट सहयोगको अपेक्षा गरेको बताए ।

कार्यक्रममा प्रजातन्त्र सेनानी, प्रतिष्ठित उद्योगपतिलगायत २९ जनालाई सम्मान गरिएको थियो ।