काठमाडौं । नेपाल क्रिकेट संघ (क्यान) को जनरल म्यानेजर (जीएम) नियुक्तिमा विवाद उत्पन्न भएको छ । 

क्यानको नयाँ जएीम नियुक्तिमा व्यक्तिगत स्वार्थ हाबी भएको क्यानकै कार्यसमिति सदस्यले बताएका छन् । क्यानले साउनमै दरखास्त आह्वान गरी प्रक्रियागत हिसाबले सात जनालाई अन्तर्वार्तामा बोलाउने तयारी गरेको थियो । 

तर, असोज ६ गतेको निर्वाचनपछि आएको नयाँ कार्यसमितिले उक्त प्रक्रिया स्वीकार गरेन ।

पुरानो प्रक्रिया बाइपास गर्दै क्यानले जीएमका लागि मंसिर ७ गते फेरि दरखास्त आह्वान गर्‍यो । जसअनुसार इच्छुकलाई दरखास्त भर्न मंसिर २१ गतेसम्मको समयसीमा उपलब्ध थियो ।

गत असार १४ गते तत्कालीन जनरल म्यानेजर वृतान्त खनालले राजीनामा दिएपछि पद रिक्त भएको थियो ।  खनालको राजीनामा क्यानले असार १५ गते स्वीकृत गरेको थियो ।  त्यसपछि साउन २३ गते पहिलोपटक जनरल म्यानेजरका लागि दरखास्त आह्वान गरेको थियो । 

त्यसबेला साउन ३२ गतेसम्मको ‘डेडलाइन’ तोकिएको थियो ।  दरखास्त आह्वानको केही समयपछि क्यानका तत्कालीन कार्यबाहक सचिव दुर्गाराज पाठकले जीएमका लागि २८ जनाको आवदेन आएकामा सात जनालाई सर्ट लिष्ट गरेर आईसीसीमा प्रक्रियाका लागि पठाइसकेको बताएका थिए । 

“हामीले सात जनाको नाम आईसीसीलाई पठाएको र छनोटमा परेकालाई अन्तर्वार्ताका लागि बोलाएका थियौं,” तत्कालीन कार्यवाहक सचिव पाठकले बाह्रखरीसँग भने, “तर, त्यसपछि चुनाव भयो र नयाँ कार्यसमिति गठन भयो । अनि निर्वाचित सचिवले नयाँ विज्ञापन गर्नुपर्छ भन्नुभयो । त्यसमा अध्यक्षज्यूले पनि पुरानो कामलाई निरन्तरता दिनुपर्छ भनी अडान लिन सक्नुभएन, फेरि विज्ञापन गर्नुपरेको हो ।”

हाल क्यानको कार्यसमिति सदस्य रहेका पाठक जनरल म्यानेजरको नियुक्तिमा व्यक्तिगत स्वार्थ देखिएको बताउँछन् ।

“आईसीसीबाट प्रक्रिया पूरा भइसकेपछि उनीहरुले जनरल म्यानेजर छिटो नियुक्त गर भनेका थिए । त्यसअनुसार हामीले छिटोभन्दा छिटो गर्न खोजेका हौं,’’ पाठकले भने, ‘‘तर, नयाँ सचिव वा कमिटीलाई आफू अनुकूलको हुनुपर्छ भन्ने परेको पनि हुन सक्छ । कता कता यसमा मलाई व्यक्तिगत स्वार्थमा यस्तो काम देखिन्छ । त्यस्तो नभए पहिलेका सात जनामध्येबाट नै नियुक्त गरे भइहाल्थ्यो होला,” पाठकले बाह्रखरीसँग भने ।

क्यानका सचिव पारस खड्का भने पुरानो दरखास्त आह्वान कानुनअनुसार नभएकाले नयाँ सूचना निकालिएको बताउँछन् ।

“चुनावी माहोलमा कानुनविपरीत नियुक्त प्रक्रिया सुरु भएको थियो । किनकि क्यानको चुनाव हुन दुई–तीन महिना बाँकी हुँदा जीएम नियुक्तिका लागि सूचना निकाल्नै पाइँदैन,” पारसले भने ।

उनी पुरानोमा आफ्नो इच्छा वा के–के गरे आफूलाई थाहा नभएको बताए । 

‘‘तर नयाँ कार्यसमिति आएपछि सूचना निकालिएको समय ठीक नभएको र जीएमका लागि सर्ट लिष्टमा परेकाहरूलाई पनि समेट्ने गरी नयाँ सूचना निकाल्ने निर्णय भएको हो,’’ उनले भने, ‘‘किनकि चुनावी प्रक्रियामा हुँदा सूचना निकाल्न पाइँदैन । त्यतिबेला उहाँहरुले किन त्यस्तो गर्नुभयो उहाँहरुलाई नै सोध्नुपर्ला ।”

जनरल म्यानेजरको सम्बन्धमा क्यानको विधानमा चुनावी प्रक्रियामा रहँदा जीएमको पदपूर्तिका लागि सूचना निकाल्न नपाउने भन्ने कतै उल्लेख छैन ।  क्यानको विधान २०८० संशोधनअनुसार बुँदा नम्बर ३३ मा जिएमको नियुक्ति केन्द्रीय कार्यसमितिबाट हुने र योग्यता विनियमावलीमा निर्दिष्ट गरिने उल्लेख छ ।

तर, क्यानले हालसम्म विनियमावली बनाउन सकेको छैन ।  पूर्व कार्यबाहक सचिव पाठक भने जीएमका लागि गरिएका कार्य गलत नभएको दाबी गर्छन् ।

“आईसीसीबाट हुने कार्यका लागि जीएम अनिवार्य हुन्छ । त्यसैले हामीले त्यो समस्यालाई समाधान गर्न त्यतिबेला नै नियुक्ति प्रकृया सुरु गरेका थियौं । त्यसमा विधानविपरीत भन्ने कुरा नै आउँदैन । त्यो क्यानको नियमित कार्यसम्पादनमै पर्ने हुँदा चुनावी प्रक्रियाले रोकिने विषय नै हैन,” पाठकले भने ।

जीएम नियुक्तिबारे क्यान अध्यक्ष चतुरबहादुर चन्द पनि पहिलो सूचना आह्वान गर्दा अन्तर्वार्ताको लिने तयारीमा क्यान पुगिसकेको स्वीकार्छन् ।  तर, चुनावअघि नियुक्त गर्दा राम्रो नदेखिने भएर तत्कालीन कार्यसमितिले नै नयाँ कार्यसमितिलाई जीएम नियुक्तिको प्रकृया अघि बढाउने सहमति भएको दाबी चन्दको छ ।

“चुनावअघि त्यो लामो पेन्डिङ भयो । चुनावका मुखमा त्यो राम्रो देखिँदैन भनी त्यसलाई स्थगित गरी नयाँ तरिकाले खोलेका हौं । अन्तर्वार्ताको तयारी भएको थियो । चुनावको १५ दिनअघि गर्ने भन्ने थियो । तर, चुनावअघि त्यति राम्रो देखिँदैन भन्ने कुरा आयो । पुरानो बोर्डले नै नयाँ बोर्ड आएपछि गर्ने भनेको भएर पछि निकालिएको हो,” चन्दले बाह्रखरीसँग भने ।