काठमाडौं । झन्डै साढे पाँच महिनापछि सोमबार करिब पाँच अर्ब रुपैयाँको सेयर कारोबार भएको छ । गएको असार १७ गते पाँच अर्ब आठ करोड रुपैयाँको सेयर कारोबार भएको थियो । आज चार अर्ब ८४ करोड २७ लाख रुपैयाँको सेयर कारोबार भएको हो ।

असार १७ पछि साउन ८ गते चार अर्ब ७३ करोड रुपैयाँको सेयर कारोबार भएको थियो । त्यसको अघिल्लो दिन साउन ७ गते चार अर्ब ३७ करोड रुपैयाँको सेयर कारोबार भएको थियो ।

सोमबार बजार १५.४० अंकले घटेको छ । आइतबार ६ प्रतिशतले बढेपछि बजार बन्द भएको थियो । यसरी सकारात्मक सर्किट लाग्दा बजार लगातार दुई दिन घट्ने गरेको छ । नकारात्मक सर्किट लागेको भोलिपल्ट भने बजार बढेको तथ्यांक छ ।

यस दिन नेप्से ०.७८ प्रतिशतले घटेर १९४८.५७ अंकमा बन्द भएको छ । ३०३ धितोपत्रका एक करोड ४६ लाख ९८ हजार ५१७  कित्ता खरिद–बिक्री भएको छ । कुल बजार पुँजीकरण ३० खर्ब चार अर्ब ५० करोड रुपैयाँ पुगेको नेपाल स्टक एक्सचेन्ज (नेप्से)ले जनाएको छ ।

कारोबारमा आएका १३ मध्ये चार समूहको परिसूचक वृद्धि भएको छ । बाँकी समूहको परिसूचक घटेको छ ।