काठमाडौं । संसद्को सार्वजनिक लेखा समितिले दूरसञ्चार सेवा प्रदायक एनसेलबाट आजियटा बाहिरिने क्रममा भएको सेयर खरिद–बिक्री प्रक्रियाका विषयमा नौबुँदे स्पष्टीकरण सोधेको छ ।

नेपाल दूरसञ्चार प्राधिकरणलाई सोधिएको स्पष्टीकरणमा एनसेलको सेयर बिक्री नियमसंगत भए÷नभएको, त्यसले नेपालको राजस्व र आयमा के÷कस्तो असर गर्छ भन्ने स्पष्ट पार्न भनिएको छ ।

समितिले त्यसको अनुसन्धान र विश्लेषण गरी 'चाँडोभन्दा चाँडो जवाफ पठाउनू' भनेको छ ।

“आजियटाले बिक्री गरेको सेयरको खरिद–बिक्री प्रक्रिया नियमसंगत हो कि होइन ? यस्तो खरिद–बिक्रीले सेवा प्रवाहमा के कस्तो असर पार्छ ? राजस्व र आयमा के कस्तो प्रभार र असर गर्छ ?,” सार्वजनिक लेखा समितिका सभापति ऋषिकेश पोखरेलले प्राधिकरणलाई सोेधेको विषय बाह्रखरीसँग बताए ।

उनले नियमविपरीत भएको भन्ने विषयलाई सार्वजनिक लेखा समितिले गम्भीर रूपमा लिएको र नियामक निकायसँग यथार्थ बुझ्न पत्राचार गरिएको जानकारी दिए ।

उनका अनुसार, हक हस्तान्तरण सम्बन्धमा भए गरेका काम–कारबाहीको अध्ययन र विश्लेषण गरी तथ्यपूर्ण विवरण यथाशीघ्र उपलब्ध गराउन भनिएको छ ।

सभापति पोखरेलको निर्देशनमा समितिका तर्फबाट सचिवालयले पत्राचार गरेको हो । समितिबाट पठाइएको स्पष्टीकरणपत्रमा राज्यलाई तिर्न बाँकी एनसेलको दायित्व, ऊसँग रहेको बेरुजु, नियमित रूपमा तिर्नुपर्ने अन्य शुल्क के हुने भन्ने विषय पनि उल्लेख छ ।

त्यसबाहेक पत्रमा नेपालका बैंक तथा वित्तीय संस्थाहरूबाट लिएको ऋण र दायित्व कसले निर्वाह गर्ने भन्ने स्पष्ट गर्नुपर्ने उल्लेख छ ।