काठमाडौं । नेपाल आयल निगम ऋणमुक्त भएको छ । निगमले गत मंगलबार अर्थ मन्त्रालय अन्तर्गतको सार्वजनिक ऋण व्यवस्थापन कार्यालयलाई अन्तिम किस्तास्वरुप ७० करोड रुपैयाँ बुझाएर ऋणमुक्त भएको हो ।

सरकारबाट लिएको सात अर्ब रुपैयाँ ऋण चुक्ता गरेसँगै निगम ऋणमुक्त भएको नेपाल आयल निगमका प्रवक्ता मनोजकुमार ठाकुरले बताए । यसअघि नै निगमले सरकारलाई ६ अर्ब ३० करोड रुपैयाँ ऋण तिरिसकेको थियो । योसँगै निगम ऋणमुक्त भएको छ । तर, आन्तरिक दायित्व भने २६ अर्ब रहेको ठाकुर बताउँछन् ।

“हामीले गत मंगलबार अर्थ मन्त्रालयको ऋण व्यवस्थापन कार्यालयलाई ७० करोड रुपैयाँ बुझाएसँगै ऋण मुक्त भएका छौँ,” उनले भने, “तर, पेट्रोल खरिद गर्दाको हाम्रो आन्तरिक दायित्व भने २६ अर्बभन्दा बढी रहेको छ । मूल्य स्थिरीकरण कोषको २१ अर्ब, एयरलाइन्स तथा विक्रेताहरूको दुई अर्ब र तीन अर्ब २० करोड २०७४ अगाडि कर्मचारी आवासका लागि गरिने प्रोभिजनको पैसा हामीले तेल खरिद गर्नमा खर्च गरेका छौँ ।”

आन्तरिक दायित्वको ब्याज नलाग्ने भएकाले सजिलो हुने ठाकुर बताउँछन् । स्वचालित मूल्य लागु भएमा नाफाबाट नै निगमले यो आन्तरिक दायित्वबापतको रकम मिनाहा गर्ने उनी बताउँछन् । तर, अहिलेकै अवस्थामा भने समस्या पर्ने उनको बुझाइ छ ।

“आन्तरिक दायित्वको ब्याज लाग्दैन । स्वचालित कार्यविधिअनुसार पेट्रोलियम पदार्थको मूल्य कायम भयो भने हामीले नाफाबाट नै आन्तरिक दायित्व पूर्ति गर्दै जानेछौँ,” उनले भने, “अहिलेकै अवस्थामा ग्यासमा प्रतिसिलिन्डर ३०० रुपैयाँ घाटा छ । निगमको ७० प्रतिशत घाटा एलपी ग्यासबाट नै छ ।”

पेट्रोल र डिजेलमा भने सामान्य नाफा छ । निगमले इन्डियन आयल कर्पाेरेसन (आईओसी)को २४ अर्ब रुपैयाँ गत वर्ष नै तिरेको थियो ।