काठमाडौं । भारतीय क्रिकेट नियन्त्रण बोर्ड (बीसीसीआई)ले पुरुष राष्ट्रिय क्रिकेट टिमका मुख्य प्रशिक्षक राहुल द्रविडसँगको सम्झौता थप गरेको छ ।

बीसीसीआईले बुधबार सामाजिक सञ्जालमार्फत मुख्य प्रशिक्षक द्रविड सम्झौता थपका लागि सहमत भएको जनाएको हो ।

यसअघि, द्रविड र बीसीसीआईबीच आईसीसी एकदिवसीय विश्वकप–२०२३ सम्मको सम्झौता थियो । सम्झौता थप भए पनि कति समयका लागि नवीकरण भएको भन्नेबारे भने बीसीसीआईले खुलाएको छैन ।

द्रविडको प्रशिक्षणमा यसै वर्ष भारतमै भएको विश्वकपमा घरेलु टिमले फाइनलसम्मको यात्रा तय गरेको थियो । अपराजित रहँदै फाइनलसम्मको यात्रा तय गरे पनि घरेलु टिम उपाधि भिडन्तमा भने अस्ट्रेलियासँग ६ विकेटले पराजित भएको थियो ।