काठमाडौं । नेपाल बुद्दिजीबी परिषद् राष्ट्रिय सुरक्षा तथा वैदेशिक सम्बन्ध अध्ययन केन्द्रले आज राजधानीमा आयोजना गरेको ‘इजरायल–प्यालेस्टाइन द्वन्द्व : नेपालमा सम्भावित असर’ विषयक बौद्धिक बहस सम्पन्न गरेको छ ।

वैदेशिक सम्बन्ध अध्ययन केन्द्रका संयोजक डा. राजेन्द्र चापागाईँले इजरायल–प्यालेस्टाइन द्वन्द्वको ऐतिहासिक पृष्ठभूमिबारे प्रकाश पार्दै वर्तमानमा जारी रहेको हमास र इजरायलबीचको युद्धका असर र युद्धप्रतिको बाह्य शक्ति राष्ट्रहरुको फरक फरक दृष्टिकोण, शक्ति संघर्षका बारेमा आफ्नो धाराणा राखे ।

कार्यक्रममा कार्यपत्र प्रस्तुत गर्दै भुराजनितिका लेखक गोपाल खनालले हमास र इजरायल दुवैले गरेको हर्कत मानवताविरुद्धको अपराध भएको बताए । यो युद्ध हमास र इजरायलको मात्र नभएर फेरिँदै गएको विश्व व्यवस्थाको परिणाम भएको समेत उनले बताए ।

कार्यक्रममा बुद्धिजीवीहरूले इजरायल–हमासबीचको युद्धले बच्चा, वृद्ध र महिला बढी प्रभावित भएको, मानवअधिकार ह्रास भएको, अन्तर्राष्ट्रिय कानुनको उलंघन भएको भन्दै बुद्धिजीवीहरुले तत्काल युद्धविराम गरी वार्ताबाट समस्या समाधान गर्न आग्रह गरेका छन् ।