काठमाडौं । नेपाली कथानक चलचित्र ‘दिमाग खराब’ले मल्टिप्लेक्समा सन्तोषजनक शोज पाएको छ । यही शुक्रबारबाट रिलिज हुने चलचित्रको शोज बाँडफाँट हुँदा सन्तोषजनक शोज पाएको हो । 

निश्चल बस्नेतको निर्देशन रहेको चलचित्रले देशकै सबैभन्दा ठूलो मल्टिप्लेक्स चेन क्यूएफएक्समा शुक्रबारलाई ६० शोज पाएको छ । क्यूएफएक्सले काठमाडौंमा २४ शोज दिएको ‘दिमाग खराब’लाई उपत्यकाबाहिर ३६ शोज उपलब्ध गराएको छ । 

यो शोज संख्या केही समय अगाडि रिलिज भएको ‘पशुपतिप्रसाद–२ : भष्मे डन’को भन्दा कम हो । ‘पशुपतिप्रसाद–२ ः भष्मे डन’ले काठमाडौं उपत्यकामा २६ र काठमाडौं बाहिर ३६ शोज गरी ६२ शोज पाएको थियो । 

आईएनआई सिनेमाजमा १२, वान सिनेमाजमा १०, एफक्युबमा ६, बिग मुभिजमा ५ मा शोज पाएको छ । 

करिब सात वर्षपछि निश्चल ‘दिमाग खराब’मार्फत निर्देशनमा कमब्याक गर्न लागेका हुन् । ‘लुट–२’पछि उनले चलचित्र निर्देशन गरेका थिएनन् । त्यसयता उनी अभिनयमा केन्द्रित भएका थिए । 

‘दिमाग खराब’मा खगेन्द्र लामिछाने, स्वस्तिमा खड्का, दयाहाङ राई, अर्पण थापा, सुमन कार्कीलगायत मुख्य भूमिकामा छन् ।