काठमााडौं । गैरआवासीय नेपाली संघ (एनआरएनए)को अध्यक्षमा राजेन्द्रकुमार शर्मा (आरके)ले उमेदवारी घोषणा गरेका छन् । 

काठमाडौंमा पत्रकार सम्मेलनको आयोजना गर्दै ६ उपाध्यक्ष, एक युवा उपाध्यक्ष र अन्य पदाधिकारीसहित शुक्रबार सार्वजनिक गरेका हुन् ।

आउँदो अक्टोबर १७ देखि २० गतेसम्म काठमाडौंमा एनआरएनएको ११औँ महाधिवेशन हुँदै छ ।

अध्यक्षका उमेदवार शर्मासँगै उपाध्यक्ष पदमा मलेसियाबाट खगेन्द्र न्यौपाने, जापानबाट रोविन्द्रप्रसाद श्रेष्ठ (गोविन्द)को उम्मेदवारी रहेको छ । न्यौपाने हालका सचिव र श्रेष्ठ हालका उपाध्यक्ष हुन् । 

उपाध्यक्षमै कतारबाट हालका युवा उपाध्यक्ष राजु रेग्मी (राज), जर्मनीबाट विजय मोक्तान, अस्ट्रेलियाबाट अभिमानसिंह बस्नेत, नेदरल्याण्डबाट शशीकान्त पौडेल र युवा उपाध्यक्षमा कतारबाट हालका युवा संयोजक अब्दुल बासिद उमेदवार रहेका छन् ।

यस्तै, उपमहासचिवमा प्रविन गुरुङ, सचिवमा लोक दाहाल, मनोजकुमार श्रेष्ठ गोर्खाली, टंक गिरी र आरसी पोखरेल उमेदवार रहेका छन् ।

यस्तै, कोषाध्यक्ष पदमा ठाकुरकुमार ढुंगाना र महिला संयोजकमा क्यानडाबाट देवकी केसी उमेदवार छन् ।

कस्ता छन् शर्मा नेतृत्वका एजेन्डा ?
एनआरएनको अध्यक्ष पदका उमेदवार शर्माले ‘२४ का लागि २४’ वटा बाचासहितको आफ्नो उमेदवारी घोषणा गरेका छन् ।

दुई वर्षे अर्थात् २४ महिनाको कार्यकालका लागि उनले ‘एनआरएनएबीच एकता, वैदेशिक रोजगारमा सुरक्षित वातावरण र सामाजिक सुरक्षा, उत्पादनमुलक उद्यममा विप्रेषणको प्रयोग, एनआरएनए कामदारको भविष्य सुरक्षा प्राधिकरण गठन’ गर्ने जस्ता विभिन्न २४ बाचा अघि सारेका छन् ।

संघ दुई टुक्रा परेको भन्दै यसलाई एकीकृत गर्ने प्रतिबद्धता उनले व्यक्त गरे । 

“यो पवित्र अभियान । समृद्ध नेपाल निर्माण गर्ने अभियान, सबैको साझा र बाध्यताले विदेशीने सबैको साझा सपना सम्पन्न गर्न कसरी दुईवटा एनआरएन हुनसक्छ । तसर्थ मेरो पहिला बाचा छ, सुरुमै मैले एनआरएनको एकताको पहल गर्नेछु र एकता गराएरै छोड्नेछु,” अध्यक्षका उमेदवार शर्माले भने ।

यस्तै, उनले सामाजिक सुरक्षाको विषयलाई पनि प्राथमिकतामा राखेका छन् । एनआरएनका ९० प्रतिशत मध्यपूर्व, एसिया, अफ्रिका र अहिले युरोपमा जागिरे रहेको बताए ।

आफू श्रमिकबाट उद्यमी हुँदै गर्दा उनीहरूका संघर्षका कुरा बुझेको बताए । श्रमिक अस्पताल, भाषाका समस्याका कारण जेलमा रहेका, सीप सिकाउने, वैदेशिक रोजगारीका क्रममा ज्यान गुमाउनेले पाउने राहत बढाउन जस्ता विषयमा आफूले काम गर्ने उनको भनाइ छ ।

यस्तै, उनले सामूहिक लगानीको विषयलाई पनि प्राथमिकता दिने बताए । 

“अहिले १३ खर्ब रेमिट्यान्स भित्रिरहेको छ । यसको सानो रकम सामूहिक लगानी प्राधिकरणमा गर्ने र त्यसमा नेपाल सरकारले वैधानिक बाटोबाट आएको रेमिट्यान्सको दुई प्रतिशत जम्मा गर्छ । त्यसपछि यो एउटा ठूलो कोष बन्ने छ,” उनले भने, “१३ अर्बको १० प्रतिशत भनेको एक खर्ब ३० अर्ब जुन राष्ट्रिय विकास बजेटको ३० प्रतिशतभन्दा बढी हुन्छ । र त्यसको १० वर्ष मात्र पनि मापन गरियो भने नेपालमा १३ खर्ब हाइड्रोमा लगानी गर्दा ६ हजार ५०० मेगावाट बिजुली उत्पादन हुन्छ ।”

यस्तै, उपाध्यक्षका उमेदवार श्रेष्ठले नेपालले श्रमिक उत्पादन गर्नेबाट उद्यम उत्पादन गर्ने बजारका रूपमा विकास गर्न आवश्यक रहेको र त्यसमा एनआरएनएले योगदान गर्ने बताए ।

उपाध्यक्षकै उमेदवार अभिमान सिंह बस्नेतले प्रतिनिधि व्यवस्थापनको समस्या र २४ वटै बाचामा काम गर्ने बताएका छन् ।

युवा उपाध्यक्षका उमेदवार बासिदले युवाहरूले पनि धेरै कुरा गर्न सक्नेमा उनीहरूलाई सचेत गराउन आवश्यक रहेको बताएका छन् ।

कोषाध्यक्ष पदका उमेदवार ढुंगानाले नेपालमा लगानीको वातावरण बढाउन काम गर्ने बताएका छन् ।

विश्वका अन्य ठाउँ जसरी १८० दिनभन्दा बढी समय देश बाहिर बस्नेलाई एनआरएनको मान्यता दिलाउनेतर्फ काम गर्ने समेत उनीहरूको भनाइ छ ।

एनआरएनएमा विश्वभरका ५९ देशबाट प्रतिनिधित्व रहेको छ । ९६ हजारभन्दा बढी साधारण सदस्य रहेको संघमा ४२ सयभन्दा बढी सदस्य मतदाता रहेका छन् ।