काठमाडौं । नेपाल चेम्बर अफ कमर्सका अध्यक्ष राजेन्द्र मल्ल ‘रियल इस्टेट’ क्षेत्र खस्किँदा अर्थतन्त्र पनि संकुचन भएको बताएका छन् ।

बिहीबार नेपाल उद्योग वाणिज्य महासंघले काठमाडौंमा आयोजना गरेको राष्ट्रिय आर्थिक बहस–सुधारका लागि सहकार्य विषयक अन्तरक्रियामा बोल्दै मालपोत र नापी कार्यालयले नागरिकलाई दुख दिन गरेको बताए । 

“रियल इस्टेट क्षेत्र खस्किँदा अर्थतन्त्र पनि संकुचन भयो । त्योसँग सम्बध इट्टा, गट्टी, डन्डी, रंगरोगन जस्ता थुप्रै उद्योग चल्न सकेनन् । यसले रोजगारी पनि घट्यो,” उनले भने ।

अध्यक्ष मल्लले मालपोत र नापी कार्यालयले निर्देशिका बनेको छैन, कानुन बनेको छैन भनेर दुख दिने गरेको बताए । फाइल घर्रामा राखेर मनोमानी हिसाबले काम गरेको भन्दै त्यसलाई सुधार गर्नुपर्ने बताए ।

“मालपोत र नापी कार्यलयमा यति गाह्रो छ माननीय ज्यू । यसमा निर्देशन दिएर चरणबद्ध रूपमा योजना बनाएर अघि बढ्नुपर्‍यो । हुन्छ भने हुन्छ, हुन्न भने फाइल फर्काइदिनु पर्‍यो,” उनले भने, “फाइल घर्रामा राखेर आफ्नो मनोमानीअनुसार काम गर्नु भएन । यसले गर्दा धेरै मान्छे फ्रइस्टेट भएका छन् ।”

मल्लले आर्थिक वृद्धि गर्न सरकारले ल्याएको नीतिअनुसार मौन्द्रिक नीति आउनु पर्ने बताए ।

“सरकारले आर्थिक वृद्धिदर ६ प्रतिशत गर्ने भन्ने लक्ष्य राखेको छ । सरकारले ल्याएको नीतिसँगै मिल्ने खालको मौन्द्रिक नीति ल्याउन आवश्यक छ । निजी क्षेत्रको माग छ,” उनले भने, “आर्थिक नीति र मौन्द्रिक नीतिको तालमेल मिलेको छैन भन्ने आम उद्योगी व्यवसायीले महसुस गरेको अवस्था छ । यसलाई समयसापेक्ष गरिनुपर्छ । उद्योग, व्यवसायीहरूलै पलायन भएभने नीतिमात्र कडा गरेर के गर्ने ? नीति एउटा, नियति अर्काे हुन भएन,” उनले भने ।

उनले आयात घटाउन र देशमा भएको प्राकृतिक स्रोत साधनलाई प्रवर्द्धन गर्नुपर्ने बताए ।

“मुलुकलाई समृद्धि बनाउनको लागि देशमा भएको प्राकृतिक स्रोतसाधनलाई कसरी प्रवर्द्धन गर्ने ? आयातलाई कसरी घटाउने ?, स्वदेशमा कसरी उत्पादन वृद्धि गर्न सकिन्छ ? विधिमा जानुपर्छ । हरेक क्षेत्रमा नियामक निकायबाट बनाउने नीति र निर्देशनको कारण उद्योग व्यवसाय फस्टाउन सकेको छैन,” उनले भने ।