काठमाडौं । नेकपा (एमाले)का अध्यक्ष केपी शर्मा ओलीलाई स्वागत गर्न गएका कार्यकर्ताहरू जनकपुर विमानस्थलको धावनमार्गमा पुगेका छन् । 

आज मधेस प्रदेशको अधिवेशन उद्घाटन गर्न गएका ओलीलाई स्वागत गर्न कार्यकर्ताहरू धावनमार्गमा नै पुगेका हुन् । 

सुरक्षाकर्मीले छेक्दाछेक्दै उनीहरू धावनमार्गमा प्रवेश गरेको विमानस्थलका प्रमुख भीमदत्त पन्तले जानकारी दिए । 

“उहाँहरूको टोली १०, १५ जना थियो । सुरक्षाकर्मीले छेक्छाछेक्दै माननीय सांसद, मेयर पूर्वमेयर पनि त्यहीँ गए,” उनी भन्छन्, “झर्ने प्यासेन्जर पनि उपस्थित भइदिए । त्यसले गर्दा भिड देखियो ।”

उनले यसबारे विमानस्थलका सुरक्षागार्डलाई स्पष्टीकरण सोधिने जानकारी दिए । 

“विमानस्थल सुरक्षा गार्डलाई यो के कारणले भएको हो भनेर पत्र पठाउँछौँ,” उनी भन्छन् ,“हामीलाई पनि नरमाइलो लाग्यो । यस्तो नहुनुपर्ने भयो ।”