काठमाडौं । प्रधानमन्त्री पुष्पकमल दाहाल प्रचण्डले बीआरआईमा आधारित परियोजना अघि बढाउन नेपाल प्रतिबद्ध रहेको बताएका छन् ।

आइतबार काठमाडौंमा आयोजना गरिएको ‘बीआरआईको एक दशक ः व्यापार, लगानी र सम्पर्क सञ्जाल’ विषयक कार्यक्रमलाई सम्बोधन गर्दै प्रधानमन्त्री प्रचण्डले बीआरआई परियोजना अघि बढाउन केही ढिलाइ भए पनि यसमा आधारित परियोजना अघि बढाउन नेपाल प्रतिबद्ध रहेको बताए ।

कार्यान्वयन योग्य परियोजना छनोट र कार्यान्वयन हुने गरी बीआरआईसम्बन्धी विकास निर्माणका परियोजना अगाडि बढाउने सरकारको स्पष्ट धारणा रहेको उनले बताए । कोभिड महामारी, हाम्रा प्रणाली र संरचनागत सीमाहरुका कारण बीआरआई परियोजनामा ढिलाइ भएको उल्लेख गर्दै प्रधानमन्त्री प्रचण्डले बीआरआई परियोजना कार्यान्वयनमार्फत विकास र समृद्धिलाई तीव्रता दिन चाहेको जिकिर गरे ।

उनले चिनियाँ पक्षले पनि लगानीसम्बन्धी आफ्नो नीतिमा पुनर्विचार गर्दै कतिपय परियोजनाहरूका सन्दर्भमा नेपालका लागि अनुदान र सहायताको नीति लिने विश्वास व्यक्त गरे ।

उनले आफ्नो चीन भ्रमणका क्रममा भएका १३ वटा विभिन्न समझदारी र सम्झौता एवं संयुक्त वक्तव्यमा उल्लेख भएका समझदारीले नेपाल र चीनबीचको आर्थिक, सामाजिक, सांस्कृतिक, राजनीतिक र जनस्तरको सम्बन्धलाई थप सुदृढ बनाउन महत्वपूर्ण भूमिका खेल्ने दाबी गरे ।

त्यस्तै, उनले नेपाल विगतदेखि नै एक चीन नीतिको पक्षमा दृढ रहँदै आएको र वर्तमान तथा भविष्यमा समेत एक चीन नीतिप्रति दृढ रहने स्पष्ट पारे ।

कार्यक्रममा नेपालका लागि चिनिया राजदूत चेन सङले बीआरआईमा आधारित परियोजनालाई नेपालको विभिन्न क्षेत्रमा सफल कार्यान्वयनका लागि चीनले आवश्यक सहयोग गर्ने बताए । स्थानीय विकासका लागि बीआरआई निकै महत्वपूर्ण देखिएको भन्दै उनले बीआरआईका बारेमा जनतालाई सही सूचना दिएर यसलाई नेपाल सरकारले अघि बढाउने विश्वास व्यक्त गरे ।

उनले विभिन्न क्षेत्रमा आर्थिकलगायतका क्षेत्रको विकासका लागि चीनको सदैव सकारात्मक सहयोग निरन्तर हुने जिकिर गरे ।