काठमाडौं । माल्दिभ्सको राष्ट्रपति निर्वाचनमा वर्तमान राष्ट्रपति इब्राहिम मोहम्मद सोलिहलाई पराजित गर्दै मोहम्मद मुइज्जु विजयी भएका छन् । मोहम्मद मुइज्जु चीन समर्थक मानिन्छन् । सोलिहले भारतसँगको सम्बन्ध सुधार गरेका थिए ।

राष्ट्रपति सोलिहले हार स्वीकार गर्दै ५४ प्रतिशत मतसहित जित हासिल गरेका आफ्ना प्रतिद्वन्द्वी मुइज्जुलाई बधाई दिएका छन् ।

माल्दिभ्सको राजधानी मालेका मेयर मुइज्जुले ‘इन्डिया आउट’ नारासहित चुनावी अभियान चलाएका थिए ।

आउँदो नोभेम्बर १७ मा मुइज्जुले कार्यभार सम्हाल्नेछन् । त्यति बेलासम्म सोलिहले कार्यवाहक राष्ट्रपतिका रूपमा काम गर्नेछन् ।

४५ वर्षीय मुइज्जु प्रोग्रेसिभ पार्टीका अफ माल्दिभ्सका नेता हुन् । सन् २०१८ देखि राष्ट्रपति पदमा रहेका ६१ वर्षीय सोहिल माल्दिभियन डेमोक्र्याटिक पार्टी (एमडीपी)का नेता हुन् । बीबीसीबाट ।