काठमाडौं । नेकपा (एमाले)को वाग्मती प्रदेश कमिटीले राजनैतिक, वैचारिक प्रशिक्षणको अभावमा पार्टी पंक्तिमा दिशाविहीन बन्ने खतरा रहेको औँल्याएको छ । 

जारी प्रथम अधिवेशनको बन्द सत्रमा प्रस्तुत गरिएको राजनीतिक तथा सांगठनिक प्रतिवेदनमा पार्टीका समस्यारू खुट्ट्याइएको छ । जसमा पार्टी कमिटी भद्दा भएकाले दोहोरो छलफल हुन नसक्ने र कमिटी प्रणाली लगभग समाप्त जस्तो देखिएको उल्लेख छ । 

त्यस्तै, युवा पस्तामा पार्टीप्रतिको आकर्षण र काम कमजोर भएको निष्कर्ष निकालिएको छ । 

विभिन्न जिल्लाहरूमा बहुआयामिक अन्तरविरोधका कारण पार्टी एकता कमजोर बनेको तथा प्राय: कमिटीहरू निर्देशनमुखी देखिएको प्रतिवेदनमा उल्लेख छ ।  विभिन्न तहमा आफूलाई केन्द्र भागमा राखेर सोच्ने, योजना बनाउने र चल्ने व्यक्तिवादी प्रवृति बढ्दो रहेको प्रतिवेदनमा औँल्याइएको छ । जनसंगठन र पार्टीमा दोहोरो जिम्मेवारी लिने तर कतै पनि प्रभावकारी नदेखिने अवस्था रहेको प्रतिवेदनमा उल्लेख छ । 

कार्यकर्तामा नेता भेट्नु नै मुख्य काम रहेको बुझाइ देखिएको प्रदेश कमिटीको ठम्याइ छ । 

“कार्यकर्तामा योग्यता, क्षमता, क्रियाशीलता, इमान्दारिता र जनाधारभन्दा नेतृत्वसँगै नजिकिएर लाभ लिन खोज्ने प्रवृत्ति बढ्दो छ । अर्थात् विभिन्न ‘नेताहरूलाई भेट्ने काम नै पार्टीको मुख्य काम’ हो भन्ने बुझाइ बढ्दो छ,” प्रतिवेदनमा भनिएको छ । 

उपत्यकाबाहिरका कतिपय भूगोल कमिटी रहेका नेतारू अधिकांश समय उपत्यकामा बस्ने, एउटा बैठकदेखि अर्को बैठकसम्म र एउटा अधिवेशनदेखि अर्को अधिवेशनमा मात्र उपस्थित हुने प्रवृत्तिले पार्टी काममा नकारात्मक प्रभाव परेको बताइएको छ । 

महँगो निर्वाचन प्रणालीको कारण हैसियत हुनेहरूले उमेदवारी पाउने, कमजोर आर्थिक अवस्थाका कार्यकर्ता पछि पर्ने र निर्वाचन लडिहाले ऋणको भारले पलायन बन्नु अवस्था देखा परेको प्रतिवेदनमा भनिएको छ ।