काठमाडौं । दोलखामा एउटा राँगोलाई गोली हानेर मारिएको छ । सोमबार भीमेश्वर नगरपालिका–५, पुछारमाटीमा राँगोलाई गोली हानेर मारिएको वाग्मती प्रदेश प्रहरी कार्यालयले जानकारी गराएको छ ।

स्थानीय भगवान बस्नेतको घरमा पालिएको उक्त बीउ राँगो फुकेर उनकी श्रीमती ६० वर्षीया सावित्रामाथि आक्रमण गरेको थियो । घाइते उनलाई उपचारका लागि धुलिखेल शाखा अस्पताल दोलखामा ल्याइएको थियो ।

त्यसपछि स्थानीयले राँगोलाई नियन्त्रणमा लिन खोजे । सकेनन् । उक्त राँगोले अरू व्यक्तिमाथि समेत आक्रमण गरेको थियो ।

सो सूचनापछि प्रहरीको एक टोली घटनास्थलमा पुग्यो । प्रहरी टोलीले पनि राँगो नियन्त्रणमा लिन सक्ने अवस्था नभएको जिल्ला प्रहरी कार्यालय दोलखामा जानकारी गरायो । प्रहरीले जिल्ला प्रशासन कार्यालयसित समन्वय गर्दा राँगो नियन्त्रणमा लिने व्यवस्था मिलाउन आदेश पायो ।

त्यसपछि प्रहरीले गोली प्रहार गरेको थियो । उक्त राँगो नियन्त्रणमा लिनका लागि गएको टोलीले बोकेको ३०३ राइफलबाट एक राउन्ड गोली ‘फायर’ गरियो । गोली प्रहार गरी राँगोलाई मारिएको प्रहरीले जनाएको छ ।