काठमाडौं । सत्तारूढ दल नेपाली कांग्रेसको जारी केन्द्रीय समिति बैठकले आन्दोलनरत शिक्षकहरूको जायज माग पूरा गर्न सरकारसँग अपिल गर्ने निर्णय गरेको छ ।

बिहीबारबाट सुरू भएको केन्द्रीय समितिको शुक्रबारको बैठकमा एकमात्र निर्णय सुनाउँदै महामन्त्री विश्वप्रकाश शर्माले सरकार र आन्दोलनरत पक्षलाई वार्ताको माध्यमबाट समस्या समाधान गर्न पनि अनुरोध गरेको छ ।

“नेपाल सरकारले संसद्मा दर्ता गरेको विद्यालय शिक्षा विधेयकलाई लिएर मुलुकभरका शिक्षकहरू आन्दोलनमा उत्रिएको वर्तमान अवस्थामा सबै किसिमका जायज माग र भावनालाई शान्तिपूर्ण वार्ताको माध्यमबाट समाधान निकाल्न सकिन्छ भन्ने दृढ विश्वासका साथ सरकार र आन्दोलनरत पक्षबीच भइरहेको वर्ता नेपाली कांग्रेस हार्दिक स्वागत गर्दछ,” निर्णय सुनाउँदै महामन्त्री विश्वप्रकाश शर्माले भने ।

शर्माले अहिलेको शिक्षा विधेयकमा सर्वस्वीकार्य नभएको स्वीकार गर्दै संसदीय प्रकृयाबाट विधेयक सर्वस्वीकार्य बनाउने भन्दै यसको प्रतिबद्धता पनि बैठकले गरेको निर्णय सुनाएका छन् ।

“विद्यालय शिक्षाको वर्तमान अवस्था परिवर्तन गर्न र शिक्षक एवम् विद्यालय कर्मचारीहरूको वर्षौ देखिका समस्याहरू समाधान गर्न समयानुकूलको ऐन बहुप्रतिक्षित थियो अघिल्लो ऐन र कानुनी व्यवस्थाहरूको तुलनामा प्रस्तावित विधेयकले कतिपय विषय समेट्नु एकातिर सुखद छ भने अर्कातिर कतिपय  सम्बन्धमा विद्यालय शिक्षाको गुणस्तर बढाउने सन्दर्भमा संविधानको मर्म पूर्णरूपमा आत्मसाथ गर्न सकेको छैन । जायज र उपयुक्त मागलाई सम्बोधन गर्न नसकेको देखिन्छ,” उनले भने, “यो विधेयकलाई ऐन बनाउँदा यसमा परिमार्जन संशोधन गर्नुपर्ने विषय छन् । संसदीय प्रकृयाबाट सर्वस्वीकार्य बनाउन पहद कदमी लिने प्रतिबद्धता जायर गर्दै सरकार र आन्देलनरत पक्षले सार्थक वार्ताबाट यथाशिघ्र समस्याको समाधान खोज्न र पठपाठन सुचारु गर्ने वातावरण निर्माण गर्न अपिल गर्दछौँ ।”