काठमाडौं । पूर्वअर्थमन्त्री डा. युवराज खतिवडाले वर्तमान सरकारको अकर्मण्यताको कारण बजार मूल्य अत्यधिक रुपमा वृद्धि भएको आरोप लगाएका छन् ।

आइतबार नेकपा (एमाले)को उपभोक्ता हित संरक्षण तथा सुशासन विभागले आयोजना गरेको बढ्दो महँगी र उपभोक्ताको सवाल विषयक गोष्ठीमा बोल्दै पूर्वअर्थमन्त्री डा.खतिवडाले यस्तो आरोप लगाए ।

एमालले सरकार सञ्चालन गर्दा मूल्यवृद्धि ४.६ प्रतिशतभन्दा माथि नभएको जिकिर गर्दै उनले एमालले सरकारमा हुँदा २०७४ देखि ०७८ सम्मको बीचमा औसतमा ४.६ प्रतिशत वृद्धि मात्रै भएको बताए ।

वर्तमान सरकारको अकर्मण्यताको कारण अहिले औसतमा उपभोक्ता मूल्यसूची सात प्रतिशतभन्दा माथि गएको उनले बताए । पछिल्लो चार वर्षमा भएको मूल्यवृद्धिभन्दा पनि पछिल्लो दुई वर्षमा बढी मूल्यवृद्धि भएको दाबी उनको छ ।

डा.खतिवडाले मूल्यवृद्धि हुँदा आर्थिक मन्दी भन्ने गरेको भन्दै आर्थिक मन्दीमा मूल्यवृद्धि हुनुपर्ने अर्थतन्त्रको सिद्धान्तविपरीत भइरहेको बताए । उनले पछिल्लो समय बजारमा आर्थिक मन्दी र बजारमा कृतिम अभाव, एकाधिकार प्रवृत्ति हुँदा समेत सरकारको अनुमगन नहुँदा समस्या रहेको बताए ।

एमालको सरकार भएको बेला अनुगमनको प्रणालीलाई व्यवस्थित गर्न खाजे पनि त्यो निरन्तरता हुन नसकेको उनको भनाइ छ । सरकारले नियन्त्रण, नियमित गरेका वस्तुहरु पनि नियमित र समयमा नगर्दा मूल्यवृद्धि उच्च भएको उनले बताए ।

चाडपर्वको लागि भनेर भन्सार दर घटाएर सरकारले मूल्यमा राहत दिन सक्नुपर्ने भन्दै उनले उपभोक्तालाई क्षणिक लाभ दिँदा सरकारलाई केही बेफाइदा नहुने बताए । सरकारले उखु मिलहरुलाई प्रोत्साहन गरी चिनी उत्पादन बढाउन जोड दिनुपर्ने भए पनि त्यसो गर्न नसकेको उनले उल्लेख गरे । सरकारले भन्सार नाकाहरुबाट हुने आयातमा पनि देखावटी मात्रै नियन्त्रण गरको आरोप उनले लगाए ।

डा.खतिवडाले सरकारले आफ्नो अनुउत्पादक खर्च घटाउन सक्नुपर्ने बताए । जथाभावी संस्थाहरु स्थापना गरेर खर्च गर्दा उपभोक्ताहरु मारमा परेको भन्दै उनले अप्रत्यक्ष करमा आभारभूत वस्तुमा कर छुटको हटाएको व्यवस्था सरकारले फिर्ता लिनुपर्ने बताए ।