काठमाडौं । प्रधानमन्त्री पुष्पकमल दाहाल 'प्रचण्ड'ले चीन भ्रमणका क्रममा पोखरा र गौतमबुद्ध अन्तर्राष्ट्रिय विमानस्थललाई पूर्णरूपमा सञ्चालन ल्याउन पहल गरिने बताएका छन् ।

शुक्रबार नेपाल नागरिक उड्डयन प्राधिकरण (क्यान)को सिनामंगलमा बनेको नयाँ भवनको उद्‌घाटन समारोहमा प्रधानमन्त्री प्रचण्डले चीन भ्रमण पोखरा र गौतमबुद्ध अन्तर्राष्ट्रिय विमानस्थल सञ्चालनमा केन्द्रित हुने बताएका हुन् ।

“चीन भ्रमणको सन्दर्भमा पोखरा र भैरहवा विमानस्थलमा के कसरी पूर्णरूपमा सञ्चालन गर्न सकिन्छ, मेरो ध्यान त्यसमा केन्द्रित रहेको पनि म यहाँहरूलाई जानकारी गराउन चाहान्छु,” उलने भने ।

उनले सरकारले विमानस्थल सञ्चालनका लागि आवश्यक पहल गरिरहेको पनि बताए । “सञ्चालनमा आइसकेको यी विमानस्थल पूर्णकार्य क्षमतामा सञ्चालन ल्याउनका लागि सरकारको तर्फबाट आवश्यक पहल र अग्रसरता लिइरहेको म यहाँहरूलाई जानकारी गराउन चाहान्छु ।”

अर्को प्रसंगमा प्रधानमन्त्री प्रचण्डले उड्डयन सुरक्षा र व्यवस्थापनमा परिणाम दिन सके नयाँ भवनको औचित्य पुष्टि हुने बताए । “हामीले जनतालाई दिने सेवा सिभिल एभिएसनको सेक्युरिटी र म्यानेजमेन्टको क्षेत्रमा परिणाम जति राम्रो दिन सक्छौँ, त्यसले भवनको उद्‌घाटनको औचित्य पुष्टि हुन्छ,” उनले भने, “विगतमा एउटामात्र अन्तर्राष्ट्रिय विमानस्थल भएकोमा २०७९ सालमा भैरहवा र पोखरा विमास्थलमो निर्माण कार्य सम्पन्न भएको छ ।”