विराटनगर । सुनसरीको धरान उपमहानगरपालिकाका मेयर हर्क साम्पाङले आफूलाई प्रश्न गर्ने एक युवकलाई पक्राउ गर्न लगाएका छन् । साम्पाङलाई प्रश्न गर्ने धरान–१५ का अशोक लिम्बू पक्राउ परेका हुन् । उनी शुक्रबार साँझदेखि इलाका प्रहरी कार्यालयको थुनामा थिए ।

लागुऔषधविरुद्ध साप्ताहिक रूपमा सचेतना अभियान सञ्चालन गर्दै आएका मेयर साम्पाङलाई लिम्बूले कार्यस्थलमै प्रश्न गरेका थिए । मेयर बोल्दै गर्दा लिम्बूले प्रश्न गर्दै गरेको ‘भाइरल’ भिडियोमा देख्न सकिन्छ ।

लिम्बूले ‘धरानवासी डेंगीबाट आक्रान्त भइरहँदा समेत हर्क दाइ तपाईंचाहिँ किन फोटो खिचाउँदै हिँड्नुभएको ?’ भन्दै साम्पाङलाई प्रश्न सोधेका थिए । उनले ‘सडकमा पानी जमेको र स्थानीयलाई हिँड्डुलमा समस्या हुँदा समेत उपमहानगरले किन काम नगरेको ?’ भन्दै अर्को प्रश्न गरेका थिए ।

‘आफ्नो विरोध गर्न आएको’ भन्दै साम्पाङले नगर प्रहरीमार्फत लिम्बूलाई तत्कालै पक्राउ गर्न लगाएका हुन् । शनिबार साँझ इलाका प्रहरी कार्यालयले लिम्बूलाई थुनामुक्त गरेको छ ।

सो कार्यालयका प्रमुख एवं डीएसपी नवराज मल्लले मेयर साम्पाङले मौखिक उजुरी दिएको तर लिम्बूलाई थुनामा राखिरहनुपर्ने कारण नदेखिएकाले छोडिएको बताए । नगर प्रहरीले नियन्त्रणमा लिई लिम्बूलाई प्रहरीकहाँ पुर्‍याइएको थियो ।