काठमाडौं । नेपाल लाइफ इन्स्योरेन्स कम्पनीले सोलुखुम्बुको प्रसिद्ध धार्मिकस्थल दूधकुण्डमा तीर्थयात्रीका लागि स्वास्थ्य शिविर आयोजना गरेको छ । नेपाल रेडक्रस सोसाइटी टाक्सिन्दु उपशाखाको सहकार्यमा शिविर आयोजना गरिएको हो । 

कम्पनीले भदौ ११ गतेदेखि १४ गतेसम्म निःशुल्क प्राथमिक स्वास्थ्य शिविर सम्पन्न गरेको हो ।

शिविरबाट ४२२ जना भक्तजन प्रत्यक्ष लाभान्वित भएको कम्पनीले जनाएको छ । कम्पनीका अनुसार शिविरमा २१० जनाको स्वास्थ्य परीक्षण, १४६ जनालाई औषधि वितरण, ६४ जनालाई प्राथमिक उपचार र दुई जनालाई एम्बुलेन्स सेवा प्रदान गरिएको छ ।

मेलाको बखत उच्च स्थान भएकाले टाउको दुख्ने, बान्ता हुने, शरीरका जोर्नी दुख्ने, श्वासप्रश्वासमा समस्या हुने जस्ता लक्षण भएका बिरामीहरूको उपचार गरिएको थियो । 

आगामी दिनमा कम्पनीले संस्थागत सामाजिक उतरदायित्व कार्यक्रमअन्तर्गत सामाजिक, आर्थिक, सांस्कृतिक, शैक्षिक जस्ता क्षेत्रमा सकारात्मक परिवर्तन ल्याउनका निम्ति कार्यक्रम सञ्चालन गर्ने कम्पनीका प्रमुख कार्यकारी अधिकृत प्रवीणरमण पराजुलीले बताए ।

कम्पनीले सेवाग्राही तथा ग्राहकहरूका लागि देशभर फैलिएका १९२ कार्यालय सञ्जालमार्फत जीवन बिमासम्बन्धी सेवा उपलब्ध गराइरहेको छ ।