काठमाडौं । निर्देशक निश्चल बस्नेतको नयाँ सिनेमा कात्तिक २४ गते रिलिज हुँदै छ । केही समय अगाडि छायांकन सकिएको सिनेमाको अहिले पोष्ट प्रोडक्सनको काम भइरहेको छ । 

लामो समयपछि निश्चल निर्देशनमा फर्किन लागेका हुन् । ‘लुट–२’ पछि निश्चलले चलचित्र निर्देशन गरेका हुन् । 

“दिमाग खराब भएको भएर यो सिनेमा बनाएको हुँ । दिमाग खराब हुनेहरूले के गर्न सक्छौँ । दिमाग खराब गराउनेहरूको दिमाग खराब पनि त गराउन सक्छौँ भन्ने सोचबाट यो सिनेमा बनाएका हौँ,” दिमाग खराब कस्तो सिनेमा हो ? भन्ने प्रश्नमा निश्चल भन्छन्, “यसमा सोसियोे पोलिटिकल एलिमेन्ट्स छ । डार्क ह्युमर पनि छ ।”

निश्चलले आफूलाई मनमा लागेको र सिनेमामार्फत भन्न मन लागेको कुरा ‘दिमाग खराब’मार्फत भन्ने प्रयास गरेको उनले बताए । 

“सुरुमा सोचेको आइडियालाई उतार्ने प्रयास गरेका छौँ । कथा र स्क्रिन प्ले हेर्दा न्याय भएको छ भन्ने लागेको छ,” उनले भने । 

निश्चलको निर्देशन रहेको सिनेमामा दयाहाङ राई, खगेन्द्र लामिछाने, स्वस्तिमा खड्का, अर्पण थापा र विजय बराल मुख्य भूमिकामा छन् ।