काठमाडौं । काठमाडौं महानगरपालिकाको न्यायिक समितिमा उजुरी दिनेको संख्या बढेको छ । पसलहरू बन्द गराइदिन, सटर, कोठा खाली गराइदिनलगायत उजुरी दिनेको संख्या बढ्दै गएको हो ।

महानगरका उपप्रमुख सुनीता डंगोलले न्यायिक समितिमा पछिल्लो समय उजुरी दिनेको संख्या बढेको बताइन् । न्यायिक समितिको इजलासमा प्रत्येक १० मध्ये आठ उजुरी पसल बन्द गराइदिन र खाली गराउनेसम्बन्धी परेका उनले जानकारी गराइन् ।

“न्यायिक समितिको मुद्दाहरू हेरिरहँदाखेरि धेरैजसो अहिले पसलहरू बन्द गर्ने र सटर खाली गर्नुपर्‍यो, कोठा खाली गरिदिनुपर्‍यो भन्ने खालका विषय बढी आउन थालेको छ । न्यायिक समितिको इजलास बस्दाखेखि १० वटा हेर्‍यो भने आठवटाजति त कोठा खाली गराइपाऊँ, सटर खाली गराइपाऊँ, सहकारी भाग्यो, अब खाली गर्नुपर्‍यो भन्ने खालका यस्ता विषयहरू बढी आउन थालेको छ,” उनले भनिन्, “यसको संकेत पक्कै पनि राम्रो होइन । अहिले बजारमा धेरै पसलहरू बन्द हुन थालेको संकेत पनि हो । धेरैजनाले यो आर्थिक मन्दी आभास गरिरहनुभएको छ । अर्थतन्त्र चलायमान नभएको भन्ने पनि यसले संकेत दिन्छ । यस्ता खालका विषयवस्तुहरू बढी आउन थालेको छ । र, क्रम बढ्न थालेको छ । हरेक हप्ता यसका अपडेट लिदाँखेखि प्रतिशतमा बढ्न थालेको छ ।”

उपप्रमुख डंगोलले महानगरपालिकाले बजार अनुगमन र मूल्यांकनलाई तीव्रता दिने बताइन् । न्युज एजेन्सी नेपालसँग कुरा गर्दै उनले शिक्षा, स्वास्थ्य, खाद्यान्नसँगै योजना अनुगमनको पाटोलाई पनि प्रमुख विषय बनाएर महानगर अघि बढिरहेको उल्लेख गरिन् ।

नियमित रूपमा अनुगमन गर्ने कार्य व्यापारीलाई हतोत्साही गर्नु नभएको उनले स्पष्ट पारिन् ।